Total Tayangan Halaman

Minggu, 15 Mei 2011

Mateus 21 : 14 – 22

Patujolo:
Adong dua pangalaho namasa dipatuduhon di turpuk on, parjolo: pangalaho ni angka namapitung dohot nalumpuon andul tu pangalaho ni angka sintua ni malim dohot sibotosurat (ayat 14-16). Molo denggan idaon sian duru (badia) ndang gabe jaminan hatuluson sian parbagasan, songon I ma pangalaho ni angka sintua ni malim dohot sibotosurat dipambahenan ni Debata. Dihasintongan ni dirina do siboto surat dohot malim I mangolu, gabe digohi jut ni roha nasida marnida halongangan na pinatupa ni Debata tu namapitung dohot nalumpuon i. Paduahon: muruk ni Jesus tu hau ara na holan marbulung sambing so marparbue. Aha ma gunana hau namarparbue hape holan marbulung sambing ?  Aha do dipanghirimhon sian hau namarparbue; bulungbulung manang parbuena ? Dibahen Jesus do pambahenan-Na na tu hau ara laho paingothon (mangajari) halak Jahudi namangarajumi dirina bangso ni Debata alai ndang marsaor jala mangoloi (porsea) Debata. Ahama gunana badia idaon hape ndang mangolu partondionna ? Molo ditopot Tuhan I hita tu tongatonga ni bagasta manang tu inganan parkarejoanta, jut do rohaNa ala ndang jumpangsa parbue ni haporseaonta I ?

Hatorangan
Di jolo ni turpuk on di baritahon do na tarmuruk Tuhan Jesus tu angka partigatiga dohot panuhori nang situngkari hepeng na mambahen alaman ni bagas joro I gabe inganan partigatigaan nasida, pola ditunggalingkon angka meja partigatigaan nasida (ay.12). Alai nang pe disituasi natarrimas Jesus, di naro angka namapitung dohot nalumpuon mandapothon Ibana tu bagas joro I ndang gabe tarambat rimas I Ibana laho patupahon holong ni roha papatarhon huaso dohot holong ni Debata, jadi dipamalum nasida. Patar do hamuliaon ni Debata di si, laos dihamuliatehon angka dakdanak mamuji Debata, mandok : “Hosianna di Anak ni raja Daud!”. Adong panandaion di nasida, ia napatupahon tanda halongangan I : “Anak ni raja ni raja Daud”, halak namarsangap.
Tung merasa targanggu do angka Sintua nimalim dohot Sibotosurat di pandohan i. Ndang merasa mar las niroha nasida boi martupa tanda halongangan di bagas Joro ni Debata, patar huaso ni Debata namangalehon hamamalum ni parsahiton di angka ruas I, baliksa gabe jut rohanasida. Sian pangalaho on boi dohonon; ndang sude halak na dibagas joro I hape naeng pasangap Debata. Ndang sude halak naro marminggu marsitutu naeng marsaor dohot Debata. Marragam tahe motivasi dohot alasan ni jolma ro tu parmingguan. Aha do alasanta ro tu parmingguan ? Alani motivasi manang kebutuhan parhepengon do ?
Sogo situtu do roha ni angka malim dohot sibotosurat marnida halongangan na binahen ni Jesus dohot umbege dakdanak angka na manjoujou di bagas joro: Hosianna di Anak ni raja Daud! Pola gabe di dok tu Jesus: “Dibege Ho do hatanasida on?” Dialusi Jesus nasida mandok: Hubege do! Ndang dung dijaha hamu huroha: "Soara ni angka dakdanak dohot posoposo dipature Ho gabe pujipujian"? Alus ni Jesus I hombar songon na tarsurat di Psalm 8:3. Ndang tarambatan jolma laho mamuji Debata. Sai na torus do marsaringar pamujian tu Debata manghamuliatehon saluhut pambahenan ni Debata.
Mandapothon Pesta Paskah ni halak Jahudi do tingki i. Pesta on ma ari rea naumbalga di pestahon nasida, somalna marroan do nasida sian luat parmiaman nasida tu Jerusalem taradu so siat be inganan parmiaman gabe sipata ingkon holang nama sian Jerusalem angka natorop I mangalului inganan parmiaman. Nang Jesus, ingkon tu Betania nama Ibana marborngin.
Torang ni arina i, laho mulak tu huta I (tu Jerusalem), male ma dihilala. Dung i diida ma di dalan i hau ara sangkambona jadi didapothon ma, hape holan bulung sambing do jumpangsa disi, gabe didok ma tu hau i: Na so jadi be ho marparbue olat ni on! Jadi pintor rahar ma hau ara i.
Pambahen ni Jesus marhite hata-Na tu hau ara I molo tapadompakhon tu na tarsurat di Lukas 13:6-7, boi dohonon; sada symbol do I tu angka  malim, siboto surat nang angka halak Jahudi na gok sipaula pangalaho nasida siganup ari (pat. Pangalaho nasida di bagas joro i).
Alai holan tanda halongangan I do na diparrohahon angka sisean I, ndang ditangkup parsiajaran sian namasa i. Alani I diondolhon Jesus tu angka sisean I hariringkot ni haporsean, ndang ulaon halongangan. Sian hagogoon ni Debata do boi masa gabe rahar hau i. Haporseaon I do ojahan ni ngolu, porsea tu Debata, “Ai jaloonmuna do saluhut nasa na pinangidomuna di tangiangmuna, anggo na porsea hamu!” (21:22).

Sipahusorhusoron:
Minggunta sadari on margoar Kantate namarlapatam Endehon hamu ma di Jahowa ende naimbaru. Boasa dijouhon songon I ? marhite turpuk jamita on adong dua nanaeng dipatangkas, ima parjolo: ndang dipengaruhi situasi emosional Debata, amanta laho patupahon haluaon dohot las ni roha – songon na binahenna tu namapitung dohot nalumpuon dibagas joro i. Atik pe dibagasan hamuruhon Jesus tingkini (baru tarmuruk) tu angka partigatiga, panuhori, situngkari hepeng na di alaman ni joro I, alai ndang gabe pangambati I tu ulaonna pamalum namarsahit. Paduahon: hinorhon ni haporseaon, margogo situtu huaso tangiang ni angka partigor: “ ai jaloonmuna do nasa napinangidomuna, anggo naporsea hamu. Jala hinorhon ni haporseaon, boi martupa angka halongangan pinatupa ni angka naporsea i.
Sian na dua barita na dipabotohon diturpuk on “tarhirim” do Debata diparbue ni haporseaon. Parbue ni haporseaon ni halak Jahudi (nadiwakili angka malim dohot sibotosurat) na so tarida tangkas nadipartudos songon hau ara. Uli do idaon hau ara I ala tung gok bulungna; hape holan marbulung sambing so marparbue. Na dihaporluhon “namale” sian hau ara parbuena do ndang bulungna. Molo tataithon i tug oar ni minggu kantate on, aha ma ende nanaeng endehononta; ende naimbaru sada ? Ende I ima: parbue ni haporseaon. Parbuehon ma na tama, paboa naung muba rohamuna! ninna Jesus (Mat  3:8).
Molo tapamanat diparngoluonta on; godang sai hira naso marpanghorhon parmingguon (ibadah) i. Dung sae ibadah; tong do ndang alang roha marbada, manihai manang manihasi halak dohot manghangoluhon parngoluon haholomon i. Gabe sipaula didok halak parsaoran dohot Tuhan i. sotung tarhirim Tuhan I di parbue ni hakristenon ta I; Ai nunga pola ampe tangke tu daling ni angka hau! Onpe, sitabaon ma nasa hau na so marparbuehon na denggan jala sidabuhononhon tu api! (Matius 3:10), Nasa hau na so marparbuehon na denggan, sitabaon do, gabe bolong nama tu api. (Mat. 7:19). Ndada hamu mamillit Ahu; Ahu do mamillit hamu jala hupadiri hamu, asa laho hamu marparbue, jala asa mian parbuemuna i; asa dilehon tu hamu nasa sipangidoonmuna sian Ama i marhitehite Goarhu.( Joh  15:16).

Tidak ada komentar:

Posting Komentar