Total Tayangan Halaman

Minggu, 15 Mei 2011

Hesekiel 34 : 11 – 19

Patujolo
Ulaon ha-Parmahan-on nunga sada ulaon na somal di baritahon di Padan Narobi. Di Panguhum 20:16 “Sian saluhut halak na torop i, adong pitu ratus baoa na pinillit, angka panjaluk, saluhutna i pande mangambalangkon batu, mangkonahon obuk sada, jala ndang pilit”. Nasida ima angka parmahan di Palestina na pande mamangke ambalang (umban atau bandil). Di Palestina angka parmahan ndang mardonganhon panangga laho mangurupi nasida, manjagai manang managalului dorbia na marserak (mago). Na adong di angka parmahan I, ima: hajut (tas na dipatupa sian kulit ni binatang), inganan ni sipanganon (roti, buah-buahan kering, jaitun, keju). Dungi tungkot/ batahi (tongkat pemukul/gada, Pslm. 23:4) marguna laho paingothon birubiru na marserak sian punguanna jala manolai pahanpahan namarbadai. Pahean nasida pe nabinahen sian imbulu ni birubiru asa tarbahen las daging nasida. Somalna nasida ndang diparsangapi ala ni parkarejoannasida I na jotjot mambahen nasida hurang pantas dipanghataion jala ndang mangaradoti angka paradaton (peraturan-peraturan masyarakat), isara ndang mangulahon ruhut partangiangon (jam doa), ndang jolo marbasu laho marsipanganon, dna. Inganan nasida di lading, marataphon langit maruloshon ombun.
Angka parmahan di Palestina, manggorai angka pahanpahananna marhite siulan naung tontu, manang panjouon natontu. Gabe tung ditanda angka birubiru I do sura dohot gaya ni parmahanna. Diholom ni ari papunguon nasida ma angka birubiru I tu bagasan liang. Molo adong birubiru I naso mamparrohahon, gabe tartading ma ibana sian punguanna jala bingung. Ambalang dohot tungkot I ma napaingothon birubiru si songon I asa didapothon punguanna. Panoro na jotjot naeng mangago birubiru I ima angka asu (anjing hutan (hyena)) manang panangko. Sipata ro do babiat, singa manang gompul (pat. 1 Sam. 17:34). Alani I ingkon dungo do parmahan 24 jam sadari, gabe tung mansai diharingkothon parmahan I do angka birubiruna i.
Jotjot do nampuna birubiru manuru halak laho marmahani birubiruna ala ni angka ulaon. Parmahan na niupa ndang tarihot tu napinarmahanna, holan sabatas upa do nasida disi. Alani ma hurang do pangaradotion nasida, holan mangaradoti satongkin, mamboan tu panjampalan. Alai ingkon bertanggung jawab do tongtong nasida marharugian molo adong pahanpahanan I na mago (1 Musa31:39), baliksa molo adong bukti namasa naso hasaongan (2 Musa 22:10-13).

Hatorangan
Di Hesekiel 34:2 di dok: Ale anak ni jolma, ingkon manurirangi ma ho taringot tu halak siparmahan Israel! Jala dohononmu ma tu nasida, tu angka parmahan i: Songon on do hata ni Tuhan Jahowa: Marjea ma halak siparmahan Israel, angka na marmahan dirina sambing! Nda ingkon angka birubiru nian parmahanon ni angka parmahan.
Hata on ndang tu parmahan nasintongna (harafiah), alai mandok angka pangintuai, panggomgom di Israel naso mangulahon hasintongan. Angka parmahan na jahat do nasida naso mangulahon ulaonna dohot denggan. Angka parmahan na gagal do nasida laho mangulahon tanggungjawabna tu napinarmahan nasida. Di 34:2-6 dipatorang, holan naringkot dinasida sambing do dipingkiri nasida, manangko, pamokmokhon dirina. Diseati do birubiru I, digadis, dipasombu marserak, ndang diradoti. Di Jeremia 23:1 Marjea ma parmahan, angka na mangago dohot paserakkon birubiru na huparmahani, ninna Jahowa. Dibahen i boti hata ni Jahowa, Debata ni Israel dompak parmahan, angka na marmahan bangsongku: Nunga dipaserak hamu punguanku, jala dionjar hamu, jala ndang dimatamatahon hamu nasida. Ida ma, luluhononku ma tu hamu hinajahat ni pambahenmuna, ninna Jahowa.(Jer. 23:2).
Di dok panurirang Jeremia (23:11-16), ala hajahaton ni angka parmahan I, Debata sandiri nama marmahani jala manguluhon birubiru-Na, jala  uhumon ni Debata angka parmahan na jahat i.
Parmahan nadenggan do Debata (1 Musa 48:1-5; Pslm. 23; Jer 31:10). Papunguon ni Debata ma muse angka birubiru-Na I jala manguhum angka parmahan najahat i. Pahoton na do muse sahalak parmahan haposan-Na (Hes. 34:23). Dibagasan hasintongan do parmahanonon ni Debata nasida (Pslm. 78:71, Jes. 44:28; 63:11; Jer 2:8; 10:21; Sak 11:4-17). Rohahonon-Na do birubiru I, papunguonNa namarserak I, manogunogu nasida tu jampalan nalomak di tano nasida, dilului angka namago dohot namampar jala toguonna mulak; mangalilit (membalut) angka namabugang jala margogoihon namarsahit jala pamalumon-Na.
Di Padan Narobi, dipatudos do Debata songon Parmahan ni Israel (1 Musa. 49:24; Pslm. 80:2), nalambok pangaduna (Jes 40:11). Sipata parmahanion I gabe uhuman molo hona uhuman nasida (Jer 50:6; 51:23; Sak. 13:7).
Di ayat 16 adong pandohan na ringkot tangkasan di dok: “…alai anggo na mokmok i dohot na gogo i siaphononku do, ahu sandiri tahe marmahansa marhitehite uhum.” (.. tetapi yang gemuk dan kuat akan Kubinasakan sebab Aku gembala yang melakukan apa yang baik, Alkitab BIS). Ala naung so tangkas be tulisan aslina olo do asing penerjemahan jala gabe marasing nang lapatanna. Hata “siaphononku” terjemahan sian hata nahurang tangkas be hurufna ('ASYMID, siaphononku -  'ASYMIR, ramotanku).
Di  ayat 1-8 ditaringoti do pangalaho hajahaton ni angka parmahan. Ndang ditogu jala diramoti angka napinarmahan I dohot denggan. Parmahan dison ima gombaran ni angka uluan/ panggomgomi ni halak Israel. Adopan nasida ma Debata laho mempertanggungjawabhon halak Israel na diterlantarhon.
Di ayat 11-16 manaringoti parmahan na denggan, ima Debata sandiri, na manogunogu jala mangaramoti birubiruNa.
Ayat 17-22 manggambarhon uhuman tu angka birubiru namarpangalahohon naso denggan tu angka birubiru naasing. Birubiru na jahat I gombaran ni angka keluarga kerajaan, pembesar nang angka malim namarlomolomo tu masyarakat. Ala marpardomuan do I tu panguhuman, hata “siaphononku” ditujuhon tu angka nasida namangulahon hajahaton I ( ida pandohan ‘na mokmok i dohot na gogo I’) ima angka keluarga kerajaan nang angka pembesar istana dohot angka sintua ni malim na di bagas joro.

Panimpuli
Molo tapatomutomu turpuk jamita on dohot epistel tung mansai domu do. Marhaporsuhon do huria naparjolo I diparsiaksiak angka namarhagogoon di harajaon Rom pola godang na ingkon agoan hosa. Dipatogu jala diparmahani do nasida na dibagasan haporsuhon godang I asa tongtong marhabengeton
… ai dohot do Kristus manaon na porsuk humongkop hamu, tumadingkon tiruan di hamu, asa diihuthon hamu bogas ni patna (1 Pet 2:21)ndang tagamon loasonna partigor i humasusa ro di salelenglelengna.” (Psalm 55:23). Laos sunggulsunggul jala sipaingot do on nang tu hita “namargogo” asa unang marlomolomo maradaphon angka jolma na asing, jala asa taulahon ulaon haparmahanion I denggandenggan dibagasan biar maradophon Debata – unang songon na pinaksa, sian las ni roha ma mangihuthon Debata; unang ala ni pangomoan hailaon, sian ringkot ni roha ma! (1 Pet. 5:2)
Sada pangalaho na tung dihagigihon Jahowa dipambahen ni birubiru I ima roha naso marpanarihon dohot elat ni roha: “Maotikku dope huroha di rohamu naung jinampalmuna i jampalan na lomak i, dohot do ebaeba ni jampalanmuna i, ingkon popoanmuna marhitehite patmuna, jala aek na tio diinum hamu, alai anggo ebaebana i dilitohi hamu do marhitehite patmuna.” (Apakah belum cukup bagimu bahwa kamu menghabiskan padang rumput yang terbaik? Mesti pulakah kamu injak-injak padang rumput yang lain-lain dengan kakimu? Belum cukup bahwa kamu minum air yang jernih? Mesti pulakah yang tinggal itu kamu keruhkan dengan kakimu?). Hasogiron do pangalaho sisongon di Debata; “Ida ma, ahu ma manguhum di holangholang ni birubiru … ” Di dok Jesus Parmahan Bolon nasintong I (Joh. 10:11, 14) di parumpamaan “ Situtu do na hudok on tu hamu; Nasa na binahenmuna tu sada sian anggingku angka na metmet on, na tu Ahu do i dibahen hamu!” (Mat.25:40).

Tidak ada komentar:

Posting Komentar