Johannes 20 : 1 – 10

1. Holong ni roha di Tuhan Jesus patubu pangantusion dohot haporseaon di ulaon ni Tuhan Jesus.

Di pinggir Kota Jerusalem, adong do sada lokasi tanoman na pineop ni si Josep na sian Arimatea, sahalak bangsawan Jahudi do ibana. Dung hira botari, di ari Jumahat i, dipamasuk si Josep na sian Arimatea i ma bangke ni Jesus tu sada liang batu naung adong hian di lokasi kuburan i. Dungi, ditutup ma pintu ni liang i dohot batu. Dung ditutup, disahap ma dohot sahap ni si Latus (Mat 27:66), asa unang adong namambuka. Angkup ni i, ala dirajumi Pamarenta Rom do sialo Kesar Rom Tuhan Jesus, jala torop angka pengikut Na, dijaga angka soridadu do kuburan ni Jesus i.

Di ari patoluhon, dung ditanom Jesus di kuburan i, pas di ari parjolo dung salpu Sabat i, ima sogot di ari Minggu (istilah Gorik na dipangke ima “proi”, mandok sekitar pukul 3.00-6.00 manogot), lao ma Si Maria Magadalena manopot kuburan i. Ia si Maria Magdalena, na ro do i sian kota Magdala di pesisir pantai Tao Galilea. Ibana ma sahalak na hea dipamalum Jesus sian panggosagosa ni pitu tondi na hodar dohot sian parsahiton naung mansai leleng diae (Luka 8:2). Ibana ma sahalak pengikut ni Jesus na mansai burju jala na satia.

Tujuan ni si Maria Magdalena manopot kuburan ni Jesus, ima laho mamiahi bangke ni Jesus dohot angka miak na hushus (Luk 24:1). Hasomalan do di Palestina manopot kuburan ni naung tolu ari dikubur. Mangihuthon haporseaon nasida, di bagasan na tolu ari i, tongtong dope mangareapreap tondi ni na mate i di atas kuburan i. Alai dung salpu tolu ari, ditadinghon tondi ni na mate i ma kuburan i, alana bangke ni na monding i pe nunga mulai busuk, ndang boi be tandaon.

Dung sahat si Maria Magdalena tu kuburan i, diida ma naung dihindat batu tutup ni tanoman i (ayat 1). Ro ma tu roha na mandok, naung ditangko halak bangke ni Tuhan i. Ia so i, naung dibuat soridadu i bangke ni Tuhan i asa dileai, alana ndang sombu dope roha nasida molo holan mamparsilangkon Tuhan i sahat tu na mate. Dipingkiri roha ni si Maria Magdalena, ndang taratasan na be na masa i. Gabe marlojong ma ibana manopot si Petrus dohot tu si Johanes, paboahon tu nasida:” Nunga dibuat namambuat Tuhan i sian TanomanNa: ndang binoto manang tu dia ditaruhon” (ayat 2c).

Dung dipaboa si Maria Magdalena tu si Petrus dohot si Johanes, na so di tanoman i be Tuhan Jesus, pintor marlojong do nasida na dua manopot tanoman ni Jesus (ayat 4). Parjolo do sahat si Johanes. Mungkin, ala umposo ibana sian si Petrus. Gumogo ibana marlojong. Parjolo do masuk si Petrus tu tanoman i. Alai anggo si Johanes, holan dipaunduk do jolo dirina mandulo tanoman i. Parpudi do si Johanes masuk tu udean i. Satongkin, longang do roha ni si Petrus mamereng tanoman na rumar i, alai anggo si Johanes nunga mulai marpinggkir. Pingkiran ni si Johanes:”Molo adong na mambuat bangke ni Tuhan i, boasa ndang dibuat angka sekka panaputi ni uluna dohot angka pangalilit i. Tongtong do dibalun di inganan na. Sekka panaputi ni uluna, tongtong do di inganan ni uluna hian. Marhite i, dipingkiri rohana ma, ndang na dibuat namambuat Tuhan i, alai na hehe do, gabe tinggal ma angka sekka panaputi ni uluna dohot pangalilit na i.

Mansai patar do taida di jamita on gogo dohot huaso ni holong ni roha. Hinorhon ni holong ni roha ni si Maria Magdalena di Tuhan Jesus, sisi do sian ibana nasa habiaran laho papatar holong na tu Tuhan Jesus. Laho do ibana manopot kuburan ni Jesus nangpe holom dope sahat ibana tu kuburan i. Hinorhon ni holong ni roha ni si Maria Magdalena di Tuhan Jesus, ibana do parjolo sahat tu udean i. Hinorhon ni holong ni si Maria Magdalena di Tuhan Jesus, boi do ibana mangoloi Tuhan Jesus sian nasa roha dohot gogo na, nangpe so apala tangkas diantusi ibana sude na hinatahon ni Tuhan Jesus (ayat 9) dohot angka na masa na ni ida na di tanoman i. Hinorhon ni holong ni roha ni si Johanes di Tuhan Jesus (ayat 2), ibana do na parjolo porsea di hahehehon ni Tuhan Jesus sian na mate (ayat 8). Holong ni roha ni si Johanes di Tuhan Jesus mangalehon tu ibana “mata” laho manjaha angka tanda-tanda i, dohot pikiran laho mangantusi na ni idana i. Holong boi do manangkup hasintongan, molo pikiran ndang boi mangalehon kepastian. Holong boi mangantusi lapatan ni angka na masa, molo pingkiran ndang boi mangantusi.

2. Tutu situtu do hehe Tuhanta i, hita pe ingkon hehe do.

Nunga rumar tanoman i diida si Maria Magdalena dohot diida dua halak sisesean ni Tuhan Jesus, ima si Petrus dohot si Johanes. Haheheon ni Tuhan Jesus sian na mate, ima sada bukti na hot rodi saleleng ni leleng na, paboa “pilot project” na so ada tudosan, ima haluaon tu saluhut jolma manisia, nunga sidung diula Jesus dohot singkop. Marhite hamamatena di hau pinorsilang, dipelehon do hosana bahen hasesaan ni dosanta. Marhite haheheon na sian na mate, ditaluhon do musu na jumorbut di hita, ima hamatean i. Disurathon Apostel Paulus do hinauli ni panobuson ni Tuhanta Jesus on di hita, di nanidok na:”Ai molo porsea hita, naung mate Jesus dohot hehe, sandok togihonon ni Debata do rap dohot Jesus nang angka naung monding marhitehite Ibana” (1 Tess 4:14).

Ganup hita na hea mangolu di portibion, ingkon haporseaanta do hasintongan on. Molo tanoman i do ujung ni saluhut na, ndang marasing hita sian bungabunga na di ladang i. Mangerbang satongkin, dungi malos. I do ujung na. Ndang adong sihirimon be udut na. Hata ni Tuhanta na namamaritahon haheheon ni Tuhan Jesus sian na mate sadarion, tutu situtu do Barita Nauli (Berita Kesukaan-Good News) di hita saluhut na. Tung sintong do nabinaritahon ni Hata ni Tuhanta sadarion tu hita. Peristiswa Paskah (haheheon ni Tuhanta Jesus sian na mate) tutu situtu do masa (authentic), sungguh-sungguh terjadi (genuine).

Hasisintong ni Barita Nauli namamaritahon haheheon ni Tuhanta Jesus on, ndada holan dihatindanghon si Maria Magdalena, si Petrus dohot si Johanes di jamita on, alai nunga dibuktihon secara ilmu sejarah (history), ilmu purba kala (archaeology). Disiplin-disiplin ilmu on nunga membuktikan paboa tanoman nampuna ni si Josep na sian Arimatea i, rumar do di ari Paska, manang di ari Minggu manogot i. Ndang adong namamaritahon (dohot alasan mendukung manang mangalo barita i) na so rumar tanoman i di Minggu Paska i. Alai, mansai porlu do parrohahononta. Paboa ndada holan hasisintong ni tanoman na rumar i na ringkot di hita. Ai molo holan i do, ndang marlapatan i tu haporseaonta. Tu dos do i tu lapung ni eme na rumar. Manang tu ampelop ni surat na rumar, na so adong surat na. Ndang marimpola i. Molo holan barita ni tanoman na rumar do, ndang margogo i patubuhon Huria. Alai, barita ni tanoman na rumar i, diuduti do dohot barita ni Tuhan Jesus Kristus napatuduhon diriNa manang pigapiga hali. Tarhira 25 taon dung peristiwa hahehehon ni Tuhanta i sian na mate, dihatindangkon Apostel Paulus do, mandok: “Jadi dipataridahon do dirina tu si Kepas, dungi tu na sampuludua i. Dungi dipataridahon dirina sahali tu lobi lima ratus dongan; na tumorop sian angka i mangolu dope, deba do naung monding. Dungi dipataridahon dirina tu si Jakobus, dungi tu angka apostel i sudena. Alai di pudi ni saluhutna i, dipataridahon do dirina nang tu ahu, na tardok tubu di na so tingkina”.(1 Kor 15:5-8).

Boruboru, Maria Magdalena, parjolo sahali marnida tanoman na rumar i, manghatindangkon Jesus na hehe i, di Minggu Paska parjolo i. I do manguba ngolu nasida, dohot manguba tujuan (arah) sejarah ni ngolu nasida dohot ngolunta. Ala naung singkop ulaon na paluahon hita diula Tuhanta Jesus Kristus, gabe ngolu na marpangkirimon di hangoluan sogot nama ngolunta. Hamatean, ndang be ujung ni saluhut, ndang be musuh parpudi, alai “harbangan” mamongoti hangoluan saleleng ni leleng na rap dohot Sipalua, ima Tuhan Jesus Kristus naung hehe i. Hehe do Tuhanta i. Tutu situtu do Ibana hehe.

Haheheon ni Tuhanta i sian na mate, ndang tarsirang i sian haheheonta angka na porsea di Ibana. Haheheon ni Tuhanta i sian na mate, ihuthononta do muse hehe sian na mate. Tuhanta Jesus Kristus do “patumonaan” (“buah sulung”) ni angka na porsea hehe sian na mate. Mauliate ma di Tuhanta na mangalehon hamonangan on di hita marhitehite Tuhanta Jesus Kristus. Amen.