Johannnes 6:55-65

Patujolo:

Sada natung mansai ringkot di jolma di sandok portibion, ima sipanganon dohot siinumon. Ala ni ringkotna, pola dipajongjong di PBB sada seksi namangaradoti I; FAO (Food and Agriculture Organizations). 

Secara teknologi pertanian, marlumba do jolma manompa cara bertani: boi hatp suanon jala tibu boi tapuon parbue na, ndang pola godang inganan (hauma) alai boi ganda parbuena. Di guruhon dohot angka namardomuan mambahen lam gabena naniula, sudena I asa sai boi tongtong dapotan mangan jolma I diganup ingananna. Dihalojahon jolma I mangula, pasarisari sipanganon ganup ari; ditaon udan dohot las ni ari, tujuan utama asa taruli sipanganon ganup ari.

Alani I ma, tung mansai las roha ni natorop di na ditamuei Jesus nasida marhite 5 roti dohot 2 dengke, gabe sai udur nasida paihutihut Jesus. Alai nang pe dipaihutihut nasida Jesus, alai ianggo sangkap nasida: holan asa taruli sipanganon na pabosurhon parsatokinon sambaing do. Haroro ni Jesus ndang na laho mangalehon sipanganon parsatongkinan sambaing, alai sipanganon hangoluan: sandok na so male be manang ise, naung ro tu Ahu; jala na so tupa be mauas manang ise, na porsea di Ahu. (6:35).

Hatorangan:

Dipaihutihut natorop I do Jesus, alai ndang ala panandaon nasida di ha-mesiason ni Jesus na ro sian Debata laho patupa haluaon, alai ala boi Jesus mangalehon nasida mangan. Di roha nasida, molo mangihuthon Jesus gabe tarjamin ngoluna nasida, ndang malean be nasida; ai sai boi do Jesus mambahen/ paradehon sipanganon. Panimbangion na songon I do mambahen jut roha ni Jesus marnida natorop I; ndang sipanganon parsatongkinon nanaeng patupaon ni Jesus di nasida; sipanganon pardagingon  sambing. Nanaeng lehonon ni Jesus di nasida ima: roti na mangolu, na tuat sian banua ginjang i. Manang ise na manganhon roti I, mangolu salelenglelengna. Las do roha ni natorop umbege I. Alai dipandohan na mangihut “Ia roti silehononki, bahen hangoluan ni portibi on, i ma dagingku. (ay.51), manghorhon parsualan. Ndang tarjalo roha ni natorop I pandohan I (ay.52). Ndang dapot rohanasida, Ia Jesus ro pasahathon diri-Na tu portibi on gabe roti hangoluan asa saluhut jolma, pardosa I, manganhon roti hangoluan I asa taruli haluaon sogot di paruhuman i. Ndang dapot diantusi natorop I, hamamateNa do na ditaringoti Ibana di  si, ndang taringot sipanganon pardagingon.

Holan sipanganon pardagingon do di roha ni jolma I, gabe marungutungut nasida naung mandai angka halongangan binahen ni Jesus jala marlaoan maninggalhon Jesus. Tutu, gok do huaso ni Jesus; alai ndang domu tu roha ni jolma i. Diarahon Jesus do jolma I asa sada dohot Ibana. Manganhon daging dohot manginum mudar ni Jesus marlapatan pasadahon diri. Lumobi sian sipanganon pardagingon nanaeng pasahaton ni Jesus bahen di jolma i. Ndang dihalomohon Jesus halak na holan naeng taruli sipanganon pardagingon sambing sian Ibana, alai dilului do jolma naolo pasadahon diri dohot Ibana dibagasan hamateanna i.

Ndang piga halak na olo jala rade manjalo konsekwensi dohot resiko ala ni Jesus. Ndang dapot rohanasida ise Jesus sasintongna, sai hajolmaon ni Jesus do ditanda nasida; anak ni si Josep – halak Nasaret. Torop nasida ndang boi mananda Jesus lumobi sian hajolmaonna, nang pe naung godang halongangan napinatupa ni Jesus naung patuduhon hasurunganna; na gok huaso, ndada holan jolma biasa be ibana – anak ni parhau i. Ibana do Mesias na sinuru ni Debata tu portibion bahen haluaon di jolma manisia. Tutu, martanggung jawab do Ibana mangalehon mangan pardagingon, martanggung jawab di parngoluon ni jolma, laos songon I do, ingkon rade jala rela do jolma I mananggung sude resiko naingkon siadopan di dalan siboluson rap dohot Jesus.

Panimpuli:

Sian panindangion di 1 Musa, kebutuhan pokok ni jolma manisia nunga diparade Debata. Nunga ditompa Debata suansuanan dohot pahanpahan bahen sipanganon ni jolma I (ay.11, 21). Angkup ni I, naeng nian ingkon panganon ni jolma sipanganon partondion, ima “roti hangoluan”, asa dapotan hangoluan si saleleng ni lelengna jolma i.

Na niantusan (dapot roha) ni jolma holan ngolu parsatongkinan sambaing do, na boi idaon ni mata jala pabosurhon satongkin. Hape nasinangkapan ni Debata ndada holan parsatongkinan, ndada holan ngolu na jempek on, sahat do tu hangoluan saleleng ni lelengna dung boluson hamatean.

Ndang disangkapi Jesus asa manganhon daging dohot mudar-Na dipangantusion secara harafiah, sada tudosan do I – asa porsea jolma I di Ibana. Panghorhonna asa marsada (menyatu) jolma I tu Jesus Kristus. Na tutu situtu do na hudok on tu hamu: Na porsea, i do naung gabe nampuna hangoluan na salelenglelengna. Ahu do roti hangoluan i! (Joh. 6:47-48).

Dipatudos Jesus do diri-Na songon roti (sipanganon na mambahen hangoluan). Songon sipanganon na gabe kebutuhan pokok di jolma I, naeng songon I nian jolma di angka naporsea, gabe kebutuhan pokok – na rumingkot. Loja jala marhoi do jolma pasarisari sipanganonna, naeng songon I halak na porsea ingkon olo loja – marhoi mangharingkothon Jesus. Jesus do sipanganon dohot siinumonta – nagabe silehon hangoluanta. Songon sipanganon dohot siinumon naung tapasada tubagasan dirinta, naeng nang Jesus tapasada tu bagasan ngolunta on, “Ibana dibagasan hita, jala hita dibagasan Ibana”.  Manang ise porsea di Jesus gabe pasahatonna jala pasadaonna do dirina tu Jesus. Amen.