Total Tayangan Laman

Minggu, 15 Mei 2011

Lukas 13 : 23 - 30

Patujolo:
Matua sai dilului jolma do mangula ulaon na umneang, mardalan di nalapang laho manjalahi si dapothononna. Ise ma tutu olo marsompitsompit molo adong dope nalapang. Alai tung andul marasing do pardalanan ni halak naporsea mandapothon tumpal hangoluan i di banua ginjang, songon nanidok ni Tuhan Jesus di turpuk on. Sian pintu na gogot i do dalan tu haluaon i. On ma bagian sian pangarimpunan ni Jamita ni Jesus na di dolok i.

Hatorangan:
Gok do hamaolon dohot parungkilon manghangoluhon haporseaon i, tung godang do pengorbanan. Godang do halak nalosok rohana laho mangadopi pengorbanan, tumorop do namanghalomohon paihutihut/mandalani dalan nalapang, mura, hombar tu lomoniroha. Boha do hita, rade do mardalan di nagogot i ? Didok Jesus: Marungkil ma hamu, asa masuk sian pintu na gogot i; ai hudok ma tu hamu: Torop do na marsangkap naeng masuk nian, alai ndang tarbahensa.(ay.24)
Marungkil: Godang halak mangantusi ndang pola maol dapotan haluaon i, holan boi pe didok porsea tu Tuhan Jesus nunga taruli ibana di haluaon i, jala olo marminggu, manopoti dosa nunga sae i. Ndang hape songon i.
Dung tajalo haluaon i, ringkot do parsitutuon laho mangadopi angka hamaolon manghangoluhon haporseaon i: mansoadohon diri dohot angka haradeon naasing dope "namangharugihon" parngoluon pardagingon i. Di ayat 24 di dok "marungkilma" (Ind. ‘Berjuanglah’, Heber: agonizomai). Hata on do tongtong didok di Kolose 4:12 (Ind. "bergumul" manang "laboring fervently"). Marlapatan do i, di na mardalan hita di dalan na gogot i, sai marungkil do hita, marungkil ala ni namasa diportibi on. Alai naeng ma tongtong halak naporsea i boi marparbue, songon na ni dok ni Ap. Paulus: marsangap Kristus marhite sian dagingku, mangolu manang mate pe ahu, Ai Kristus do hangoluan di ahu, jala laba nang hamatean.(Filipi 1:20-21)
Gotgot do dalan tu haluaon i, gok hamaolon, jala porsuk (pat. 1 Pet. 2:20-21) jala dijou do hita manaon haporsuhon bahen di Kristus asa lam patar hamuliaon ni Kristus di ngolunta. Alai ndang marlapatan ala ni gogonta asa taruli haluaon i. Sitaonon naingkon porsanonta ima alus ni naung tajalo do haluaon napinatupa ni Kristus. Godangan halak naeng mamora jala naeng marsonangsonang do diportibion. Alai tutu godang do na berusaha naeng mardalan di dalan na sompit i, alai godang do gabe sumurut ala ndang manahan, ido umbahen didok "ndang tarbahensa.
Alai molo pinarrohahon dipartingkian sisaonari on godang do pangajarion na marbagabagahon las niroha, hamoraon, hademahon, kesuksesan. Gabe sai hira na murah meriah hakristenon i. Godang angka "naposo ni Debata" gabe hira "datu" na boi parohon hamoraon, las niroha dohot kesuksesan laho patagashon pardagingon. Torop halak Kristen mamillit dalan nalapang, ala tumabo jala sumonang. Naeng nian sude hatop, ulaon di Gareja pe (marminggu) naeng hatop, jamita jempek jala tabo begeon ni sipareon so pola ditimbangi. Pamanatonta do, nunga godang nang angka jamita na tabo begeon i marisihon rasun na pamenakhon, gabe marlaok pangidoan ni portibion na gabe manegai haporseaon so disadari angka namanjalosa.

Tudosanna boi idaonta, molo adong konser musik manang pertandingan sepakbola na favorit, sai dipadati pengunjung nanaeng marnida langsung idolana bermain. Jala somalna olo do nasida marsosaksosak di jolo ni stadion berebut masuk. Alhasil, jotjot ma masa, konser musik merenggut korban penonton namarsisosahan masuk stadion. Songon i tingki musim mudik lebaran. Marratus halak marsiadu asa boi masuk tu bagas Bus manang kereta api sian sada pintu.
Songon i ma nang tu harajaon banua ginjang, didok Jesus asa marungkil hita laho mamongoti dalan nagogot. Doshon gombaran taringot tu na manonton konser musik manang manonton bola, manang tradisi mudik, godang halak nanaeng berusaha masuk, alai otik do boi masuk. Adong syarat-syarat naingkon si gohanna asa boi masuk stadion manang tu bus dohot kereta. Na pasti, asing sian na berusaha masuk sian pintu na sesak, holan na martiket do na boi masuk! Nunga dilehon tu hita tiket tu Harajaon Banua Ginjang i, boha dohot do hita marsiadu jala mardalan di dalan laho tusi ?
Manat hita sotung sanga papos hu rohanta mangarajumi hita naung dijanghon di Banua Ginjang i. Adong sahalak natung las situtu rohana ala naeng pajumpang dohot sahalak namarsangap jala nunga hundul di sada jabatan na timbo. Nunga tung marsigorgor rohana naeng pajumpang laho manghatahatai dohot namarsangap i. Najolo, uju marsingkola namarsangap i, hea do ibana marborngin dijabu ni amanta on. Hape, aha do namasa dung pajumpang nasida ? Ngalingali do panjanghonon ni namarsangap i tu amanta i, sai hira naso marsitandaan. Nang pe dipasunggulhon amanta i di na hea do ibana marborngin di jabuna, alus ni namarsangap i "ndang
huingot i". Tung maila situtu do amanta. Atik pe ndang apala tung dos namasa i dohot na nidok ni jamita on, alai boi do i gabe tudosan ringkot ni panandaon natangkas jala parsaoran na denggan antara dua pihak, songon na ni dok ni Jesus di turpuk on (ay.22-30). Merasa kenal jala merasa dekat, ndang sae laho patandaphon naung masitandaan dua pribadi (ayat 26). On ma namasa tu angka naso di pabongot masuk i. Umpama on tudutudu ni bahaya "gede rasa" rohani. Olo do tarajumi, ala naung godang hita mangula bahen di Tuhan i, mangalean tingki tu gareja, gabe parhalado, ringgas tu punguan ni huria nunga mamboan hita tu parsaoran na denggan dohot Tuhan i (Kristus). I ma ‘gede rasa’ rohani, jala ndang tuk mamboan hita tu haluaon i. Ringkot hita manjanghon secara pribadi jala marsitutu patupa parsaoran pribadi dohot Ibana asa lam tangkas hita mananda lomo nirohaNa.

Sipahusorhusoron
Adong do peribahasa mandok, "Berakit-rakit ke hulu, berenang-renang ke tepian, bersakit-sakit dahulu, bersenang-senang kemudian. Lapatanna, "untuk hidup mulia dibutuhkan perjuangan". Tung poda na denggan do peribahasa on hombar tu pandohan ni Tuhan Jesus di turpuk on na naeng sihangoluhononta. Asa dapotan ngolu hasonangan na sasintongna i di porluhon perjuangan dohot pengorbanan. Pada umumnya, kesuksesan harus ditempuh melalui proses yang panjang, butuh waktu dan kesabaran. Kesuksesan dan kebahagiaan tidak diperoleh secara ‘instan’ atau dengan jalan pintas. Meskipun dapat diperoleh melalui jalan pintas, kesuksesan dan kebahagiaan itu biasanya bersifat semu dan temporer. Isarana, papurguk arta dohot hamoraon marhite korupsi dohot angka dalan naso sintong sai hira na sonang do idaon ngoluna gok las niroha. Alai sasintongna ndang tutu ibana marhasonangan ala sai dilelei haliluna. Nunga godang taida i di angka ari parpudi on angka pejabat na korupsi ditangkupi jala dipenjarahon. Ila nai panghilalan songon i dohot sude keluarga maila. Alani i naeng ma unduk hita diaturan, jala tarlumobi manangihon hata ni Debata na sai manghatai ganup tingki di ngolunta marsadasada.

Turpuk on paingothon hita angka naporsea asa tongtong manghangoluhon dohot mangulahon haluaon i, songon na nidok ni ap. Paulus "Mardongan biar dohot lomos ni roha ulahon hamu ma haluaonmuna! (Filippi 2:12b)
Naung diungkap Debata dalan haluaon i marhite Jesus Kristus, torop halak nanaeng bongot, alai Ndada saluhut halak, na mandok Ahu Tuhanna, bongot sogot tu harajaon banua ginjang i, holan angka na mangulahon lomo ni roha ni Damang na di banua ginjang i do!(Mat.7:21), Ai songon daging i na mate, anggo so martondi; songon i do mate haporseaon na so marulaon. (Jak. 2:26), I do huhalojahon mardongan parungkilon, marguru tu hagogoonna, na gogo situtu manghorhon di bagasan ahu. (Kol. 1:29). Alani, taparrohahon ma songon natarsurat di Jakobus 2:24 "Asa diida hamu do: Sian angka pangulaon i do gabe tigor jolma, ndada holan sian haporseaon." Ai pananginangi di hata i, anggo so diulahon, tudos ma i tu halak na paberengbereng rupa ni bohina di sorminan. (Yakobus 1:23). Amen ! 

Johannnes 6:55-65

Patujolo:
Sada natung mansai ringkot di jolma di sandok portibion, ima sipanganon dohot siinumon. Ala ni ringkotna, pola dipajongjong di PBB sada seksi namangaradoti I; FAO (Food and Agriculture Organizations). 
Secara teknologi pertanian, marlumba do jolma manompa cara bertani: boi hatp suanon jala tibu boi tapuon parbue na, ndang pola godang inganan (hauma) alai boi ganda parbuena. Di guruhon dohot angka namardomuan mambahen lam gabena naniula, sudena I asa sai boi tongtong dapotan mangan jolma I diganup ingananna. Dihalojahon jolma I mangula, pasarisari sipanganon ganup ari; ditaon udan dohot las ni ari, tujuan utama asa taruli sipanganon ganup ari.
Alani I ma, tung mansai las roha ni natorop di na ditamuei Jesus nasida marhite 5 roti dohot 2 dengke, gabe sai udur nasida paihutihut Jesus. Alai nang pe dipaihutihut nasida Jesus, alai ianggo sangkap nasida: holan asa taruli sipanganon na pabosurhon parsatokinon sambaing do. Haroro ni Jesus ndang na laho mangalehon sipanganon parsatongkinan sambaing, alai sipanganon hangoluan: sandok na so male be manang ise, naung ro tu Ahu; jala na so tupa be mauas manang ise, na porsea di Ahu. (6:35).

Hatorangan:
Dipaihutihut natorop I do Jesus, alai ndang ala panandaon nasida di ha-mesiason ni Jesus na ro sian Debata laho patupa haluaon, alai ala boi Jesus mangalehon nasida mangan. Di roha nasida, molo mangihuthon Jesus gabe tarjamin ngoluna nasida, ndang malean be nasida; ai sai boi do Jesus mambahen/ paradehon sipanganon. Panimbangion na songon I do mambahen jut roha ni Jesus marnida natorop I; ndang sipanganon parsatongkinon nanaeng patupaon ni Jesus di nasida; sipanganon pardagingon  sambing. Nanaeng lehonon ni Jesus di nasida ima: roti na mangolu, na tuat sian banua ginjang i. Manang ise na manganhon roti I, mangolu salelenglelengna. Las do roha ni natorop umbege I. Alai dipandohan na mangihut “Ia roti silehononki, bahen hangoluan ni portibi on, i ma dagingku. (ay.51), manghorhon parsualan. Ndang tarjalo roha ni natorop I pandohan I (ay.52). Ndang dapot rohanasida, Ia Jesus ro pasahathon diri-Na tu portibi on gabe roti hangoluan asa saluhut jolma, pardosa I, manganhon roti hangoluan I asa taruli haluaon sogot di paruhuman i. Ndang dapot diantusi natorop I, hamamateNa do na ditaringoti Ibana di  si, ndang taringot sipanganon pardagingon.
Holan sipanganon pardagingon do di roha ni jolma I, gabe marungutungut nasida naung mandai angka halongangan binahen ni Jesus jala marlaoan maninggalhon Jesus. Tutu, gok do huaso ni Jesus; alai ndang domu tu roha ni jolma i. Diarahon Jesus do jolma I asa sada dohot Ibana. Manganhon daging dohot manginum mudar ni Jesus marlapatan pasadahon diri. Lumobi sian sipanganon pardagingon nanaeng pasahaton ni Jesus bahen di jolma i. Ndang dihalomohon Jesus halak na holan naeng taruli sipanganon pardagingon sambing sian Ibana, alai dilului do jolma naolo pasadahon diri dohot Ibana dibagasan hamateanna i.
Ndang piga halak na olo jala rade manjalo konsekwensi dohot resiko ala ni Jesus. Ndang dapot rohanasida ise Jesus sasintongna, sai hajolmaon ni Jesus do ditanda nasida; anak ni si Josep – halak Nasaret. Torop nasida ndang boi mananda Jesus lumobi sian hajolmaonna, nang pe naung godang halongangan napinatupa ni Jesus naung patuduhon hasurunganna; na gok huaso, ndada holan jolma biasa be ibana – anak ni parhau i. Ibana do Mesias na sinuru ni Debata tu portibion bahen haluaon di jolma manisia. Tutu, martanggung jawab do Ibana mangalehon mangan pardagingon, martanggung jawab di parngoluon ni jolma, laos songon I do, ingkon rade jala rela do jolma I mananggung sude resiko naingkon siadopan di dalan siboluson rap dohot Jesus.
Panimpuli:
Sian panindangion di 1 Musa, kebutuhan pokok ni jolma manisia nunga diparade Debata. Nunga ditompa Debata suansuanan dohot pahanpahan bahen sipanganon ni jolma I (ay.11, 21). Angkup ni I, naeng nian ingkon panganon ni jolma sipanganon partondion, ima “roti hangoluan”, asa dapotan hangoluan si saleleng ni lelengna jolma i.
Na niantusan (dapot roha) ni jolma holan ngolu parsatongkinan sambaing do, na boi idaon ni mata jala pabosurhon satongkin. Hape nasinangkapan ni Debata ndada holan parsatongkinan, ndada holan ngolu na jempek on, sahat do tu hangoluan saleleng ni lelengna dung boluson hamatean.
Ndang disangkapi Jesus asa manganhon daging dohot mudar-Na dipangantusion secara harafiah, sada tudosan do I – asa porsea jolma I di Ibana. Panghorhonna asa marsada (menyatu) jolma I tu Jesus Kristus. Na tutu situtu do na hudok on tu hamu: Na porsea, i do naung gabe nampuna hangoluan na salelenglelengna. Ahu do roti hangoluan i! (Joh. 6:47-48).
Dipatudos Jesus do diri-Na songon roti (sipanganon na mambahen hangoluan). Songon sipanganon na gabe kebutuhan pokok di jolma I, naeng songon I nian jolma di angka naporsea, gabe kebutuhan pokok – na rumingkot. Loja jala marhoi do jolma pasarisari sipanganonna, naeng songon I halak na porsea ingkon olo loja – marhoi mangharingkothon Jesus. Jesus do sipanganon dohot siinumonta – nagabe silehon hangoluanta. Songon sipanganon dohot siinumon naung tapasada tubagasan dirinta, naeng nang Jesus tapasada tu bagasan ngolunta on, “Ibana dibagasan hita, jala hita dibagasan Ibana”.  Manang ise porsea di Jesus gabe pasahatonna jala pasadaonna do dirina tu Jesus. Amen.

I Musa 22 : 1 – 13

Patujolo:
Tung dokdok do pangidoan ni Debata na tu si Abraham: mamelehon si Isak, anak na hinaholongan, naung leleng dipaima jala mambahen nasida boi mengkel: gabe pelean situtungon. Nunga dilehon Debata alai diunsat muse, jala ingkon ibana sandiri do memelehon (maneat). Tung roha ni ise jolma/ ama ma natuk pasauthon i ? Alai haunduhon ni si Abraham tu Debata tumimbo do I sian holong ni rohana tu ianakhonna I, bukti ni parsitutuon ni haporseaonna tu Debata (pat. Mat.10:37). Di ayat 1 sian turpuk on, di dok: "diunjuni (jaha: diuji) Debata ma si Abraham", jala di 1 Musa 21, ditolopi Debata do dipalao anakna (Ismael) dohot si Hagar; ise be anakna? Dokdok ni sitaonon i di si Abraham, diuji Debata do haunduhon dohot haporseaonna i marhite pangunjunan bolon.

Hatorangan:
1. Ujian tu haporseaon
Tung holong situtu do rohana ni si Abraham tu Debata. Di napinangido/ diusuru Debata ibana: Buat ma anakmu na sasada i, haholongan ni roham, si Isak i, jala togihon ibana tu tano Moria, jala pelehon ibana disi bahen pelean situtungon tu sada dolok, sipaboaonku tu ho. Dipasogot si Abraham ma hehe manogotna i, dipalanoi halodena, jala diarahon dua halak naposona rap dohot si Isak, anakna i, dung i borhat ma ibana laho tu dolok, na nidok ni Debata tu ibana. (1 Musa 22:2-3). Balga situtu do holong ni roha ni si Abraham tu Debata, lumobi sian panghaholongina sian manang aha na adong di ibana, nang di anakna si Isak. Tarbukti do i sian naso pola ingkon jolo maniti ari ibana laho mangulahon parsuru ni Debata. Debata mangidohon asa dipelehon si Abraham anakna si Isak gabe pelean situtungon (1 Musa 22:1-2, songon pambahen ni bangso sileban mamelehon anakhonna, Jer.32:35). Di padan narobi, masa do mamelehon jolma (anak) tu Debata, isara Jepta (Panguhum 11:30-40); nabinahen ni halak Gibeon (2 Samuel 21:8, 9, 14); nabinahen ni si Ahas, Manasye atau Hizkia (2 Raj. 16:3; 21:6, 2 Kronika 33:6). Pangalaho nasongon i do na dihapus si Josia (2 Raja 23:10) jala na nioraan ni panurirang (Jeremia 19:5; Jehezkiel 20:30-31; 23:36-39). Tung tangkas do di orai patik pasahathon dakdanak gabe pelean situtungon (2 Musa18:21; 20:2).

Marsitutu do Debata mangidohon i? NDANG ! Dung dipatoltol si Abraham tanganna laho mambuat raut i laho maneat si Isak, diambati Debata unang saut diulahon " Unang laho tanganmu tu dakdanak i, jala unang bahen manang aha tu ibana, ai nunga huboto dihabiari ho do Debata, jala ndang diolani ho anakmu na sasada i maradophon Ahu. (Ay. 22:12) Ndang hea disangkapi Debata laho mamunu si Isak. Baliksa, dihasogohon Debata do pangalaho nasongon i, jala hamatean do uhum tu namangulahon songon i (3 Musa 20:1-5). Marlapatan, ndang disangkapi Debata asa ulahonon ni si Abraham parsuruNa i (laho mamunu anakna si Isak), ala tung maralo situtu do ulaon i tu hadirion ni Debata. Sibolis namanghalomohon jala namangidohon sisongon i, asa namangoloi Sibolis do mamelehon jolma. (Sebuah buku komentar Alkitab, Be Obedient, menuliskan Perbedaan antara "cobaan" dan "godaan": mengatakan bahwa godaan – keinginan untuk mengikuti dorongan jahat – sepertinya benar-benar logis. Godaan-godaan ini digunakan oleh Setan untuk memunculkan hal yang paling buruk dari dalam diri kita. Di lain sisi, cobaan/ujian berasal dari Allah. Ujian-ujian ini tampak tak masuk akal, dan dimaksudkan untuk memunculkan hal yang terbaik dari dalam diri kita).

Molo tauji mangantusi hatorangan ni buku be Obidient i, pangunjunan (ujian) naeng manait na dumenggan sian jolma; aha do nadumenggan naeng ro sian si Abraham sian ujian na tu ibana i? Sian Heber 11:19, molo tung pe ingkon pelehononna anakna i gabe pelean situtungon songon na pinangido ni Debata "Dirajumi rohana do, marhuaso Debata, manungguli nang sian na mate, jala mulak sian i do ibana dijalo, hira tudosan." Haporseaon na luar biasa.

2. Debata Manarihon
Boha muse ma molo so diambati Debata si Abraham laho mamelehon si Isak jala ndang dipangolu sian hamatean ? tagamon adong dope angka ujian na asing? (Patudos Heber 11:39-40). Songon i do ditaon angka si ihuthon Kristus haporsuhon godang diportibion masa di hakristenon na parjolo i (jaha Heber 11:35-38), sai hira naso tagamon do adong hamonangan jala haluaon. Nang hita pe, tagamon bolusonta do godang parungkilan namangunjuni (manguji) hita di portibion naso marhaujungan hombar tu natahirim.

Tung pos situtu do roha ni si Abraham di bagabaga ni Debata, jala ditanda ibana do Debata na nioloanna i. Nina si Abraham do tu angka naposona i: "Dison ma hamu mangulon rap dohot halode i, alai anggo ahu dohot dakdanak i, laho ma hami tu sadu i, jala ia dung martangiang hami, mulak hami tu hamu on" … Sai pilliton ni Debata di Ibana sada birubiru bahen pelean situtungon, ale anaha. " (ay.5, 8). Dua hali si Abraham dipaadophon tu situasi na tung maol. Parjolo, tingki na sinuruna I naposona paimahon (mangulon), did ok do "mulak hami tu hamu on", hape diboto ibana do naeng pelehononna si Isak; napaduahon, uju disungkun anakna I birubiru bahen pelean situtungon ? Tung dibagasan pos niroha do ibana mangalusi: Debata do paradehon i. Molo hita di posisi ni si Abraham uju i, tontu dibagasan habot ni roha do naso tarhatahon do tapanghilalahon. Adong boban na tung dokdok situtu, alai boi do dikuasai si Abraham dirina jala dibagasan pos niroha pasahathon parsorionna i tu Debata. Hot do haposeaonna i di sude bagabaga ni Debata na tu ibana, gabe boi do ibana denggan maralus tu naposona dohot tu si Isak; nang pe dibagasan haporsuhon/ parsorion ibana.

3. Teanteanan Naumarga
Biar do roha ni si Abraham tu Debata. "… ai nunga huboto dihabiari ho do Debata, jala ndang diolani ho anakmu na sasada i maradophon Ahu." (ay. 12). Di naung pinungka ni si Abraham laho mamelehon, di ida Debata na tutu do biar roha ni si Abraham tu Debata jala na rumingkot do di si Abraham patupahon na sinuru ni Debata. Parsaoran ni si Abraham na hontot tu Debata mambahen ibana sian roha na marsitutu olo mangalehon tu Debata jala mambahen dirina gabe tiruan di anakhonna. Tung gogo do mampanghorhon pangalahona na I tu hadirion ni ianakhonna, gabe tung marsahala situtu do ibana di anakhonna i. Naeng ma di partingkianta sinuaeng on sude ama Kristen gabe tiruan na denggan, tarlumobi di parngoluan partondion tu inakhonta. Manghaholongi Debata sian nasa gogo, roha dohot pingkiran, mangolu dibagasan haporseaon na togu dohot dibagasan biar mida Debata; ido teanteanan na dumenggan sian arta nang hamoraon portibion nanaeng tinggalhononhon di ianakhonta.

Sipahusorhusoron:
Sipata dibahen Debata do tu hita pangunjunan (ujian), ragam ni ujian i marpardomuan tu holong nirohanta tu dirinta dohot tu haporseaonta. Jotjot do maol niantusan panogunoguon ni Debata. Agoan do si Abraham dianakna naparjoloi i, si Ismael, dungi disuru muse laho mamunu anak napinarsinta nirohana jala anak napinarbaga ni Debata marehite i gabe torop pinomparna tu pudian ni ari. Tarbahen hita do mangoloi panogunoguon ni Debata manang tudia hita toguonNa ? Olo do hita gabe tiruan namarsinondang jala gabe pasupasu tu halak ala ni pangoloion di Debata ?

Kewajiban ni sahalak ama do laho mambohali angka inakhonna, jala tujoloan ni ari nasida muse mangulahon i tu ianhonna be. Angka baoa pagodanggodanghon ianakhona baoa jala mambohali nasida, panghorhonna gabe adong stabilitas di keluarga i. Ndang masa be krisis identitas; diboto nasida ise nasida jala aha siulaon dohot tanggungjawabna ala nunga adong idaonna na gabe model manang sitiruon. Nuaeng on nunga lam otik angka ama namangalehon tingki laho pagodang gelleng na. Nunga tartait angka ama i tu strategi ni sibolis paholanghon nasida sian tanggungjawab naung niampehon ni Debata tu angka baoa dirumahtangga. Ronsot ni ulaon laho pasarisari ngolu siapari gabe alasan namambahen angka ama dao sian parsaoran di tonga ni jabuna be. Tingki na gumodangan di luar ni jabu mambahen moru kemampuan ni ama laho mempengaruhi manang mengajari ianakhon baoa (kurang waktu = kurang pengaruh). Tanpa disadari nunga mambahen kepincangan tu perkembangan satu generasi tu generasi namangihut. Ulaon/parkarejoan nunga paholanghon ama tu ianakhon, gabe ndang adong be hubungan guru-murid. Model kepemimpinan ni ama na tung ringkot i mengalami erosi yang semakin parah (Sejak ditanamnya bibit-bibit yang telah menggeser para ayah dari kepemimpinan yang telah ditetapkan oleh Allah untuk membesarkan anak-anak lelaki mereka, maka dalam generasi kita sekarang ini bibit-bibit tersebut sudah menghasilkan buah-buah yang sedang menghancurkan kita). Godang nuaeng on angka naposo boa namadabu tu narkoba, seks bebas, pesta pora, ndang bertanggungjawab di ngoluna, mangulahon tindak kriminalitas di usia remaja.

Antong molo tauji mamareso angka parungkilon namasa di ngolunta on; sadia godang ma i na ro sian Tuhan i (Molo di 1 Musa 1:221&12 tangkas mandok namasa tu si Abraham ujian na sian Debata). Di angka na tadopi hamaolon dohot parungkilon jotjot do ala ni dosa dhot hasalaanta na ditambai pangunjunan ni Sibolis (manang na ditambahanon Debata do i laho manguji karakterta asa lam matoras haporseaonta?)

Molo tajaha 2 Korintus 1:3-7, aha do makna positif sian hamaolon na taadopi di ngolunta on? Di dok ap. Paulus, dibagasan ragam ni haporsuhon natinaonna, diapuli Debata do ibana. laos i do muse manosoi ibana laho mangapuli angka na dibagasan sitaonon ala ni haporsuhon.

Judika marlapatan: Luluhon ahu ale Jahowa (Berilah keadilan kepadaku, Ya Allah, Mzm. 43:1). Sipata sai songon na dipasombu Debata hita dimasa haporsuhon tu hita, masa dibahen portibion ketidakadilan tu hita. Alai taingot ma pandohan na di Jakobus: Ale angka donganku, las ni roha sambing ma rajumi hamu i, anggo madabu hamu tu bagasan ragam ni pangunjunan. Boto hamu ma: Na mangkorhon habengeton do pangunjunan na tu haporseaonmuna. Martua do halak na manaon di pangunjunan i: Ai dung tau ibana, jaloonna ma tumpal hangoluan, naung diparbagabaga tu angka na holong roha di Ibana. (1:2,3+12). Ai ndang pasombuon ni Debata, partigor i humasusa ro disalelengna (Psalm.55:23, pat. 2 Pet. 2:9), Jala jou ma Ahu jumpa di ari hagogotan, asa hupalua ho, asa dipuji ho Ahu.(50:15). Amen.

Markus 12:41 – 44

Patujolo:
Tung ulaon nadenggan do mangalehon pangurupion (sumbangan) tu  halak na tung mangharingkothon. Alai godang do halak marsilehonlehon (mangurupi) ndang ala nionjar ni holong niroha natutu, naeng mangalului sangap manang naeng pataridahon goarna do, manang mambuat roha, mangalului popularitas. Pangalaho nasongon I jotjot tarida di masa kampanye pemilihan (calon legislative, kepala daerah, dna). Hape dung sidung pemilihan gabe balik do pangulaonna. Hea do muse masa, dijou angka selebritis wartawan, dinalaho pasahat pangurupion nasida tu Panti Asuhan. Di huria, adong persoalan taringot naingkon mangalehon persepuluhan do manang mangalehon sian las ni roha.  Adong na maralus: "ndang sadia pandopatan ku, gabe ndang tarbahen mangalehon nuaeng !” On ma gombaran namasa diparngoluan sinuaeng on. Lam leleng lam maol do jumpang mangalehon so manghirim balos, marsilehonlehon sian las niroha, mangalehon sian bulus ni roha, mangalehon nionjar ni holong;. Songon dia do di roha ni Debata taringot tu namasilehonlehon ?

Hatorangan:
Mangihuthon ayat 35, namangajari do Jesus dibagasan Joro; jala hundul ibana tondongkon poti parasian, gabe dibereng ma pambahenan ni halak mandabuhon hepengna tu poti I (ay.41). Naboi do, ala adong namamereng gabe marsangaja ma halak mangalehon godang, tarlumobi ma namora. Alai adong sahalak boruboru namabalu, na pogos mandabuhon 2 rimis (=sasen). Rimis (Ind. “peser”, Gorik “lepton”) ima hepeng naummetmet. Upa ni halak namangula ujui I 1 dinar/ari (=128 rimis). Molo diumpamahon upa ni parkarejo kasar nuaeng Rp. 30.000,-, arga ni i: Rp. 30.000 : 128= Rp. 234,-. Jadi arga na nilehon ni namabalu i: 2 x Rp. 234,- = Rp. 468,- molo di gohi Rp. 500,-
Dung diida Jesus silehonlehon ni boruboru namabalu, napogos I, di jou Jesus ma angka sisean laho mangajari nasida mangenet sian pambahenan ni namabalu napogos i.
Ndang manaringoti silehonlehon naholan 2 rimis namasa I, alai naeng mangajarhon taringot tu haporseaon, motivasi, sikap dohot narumingkot di ngolu do nanaeng rohahononhon disi.


Di ida Tuhan I do rohanta di nalaho masilehonlehon
Di roha ni jolma, ndang sadia na nilehon ni boruboru namabalu I martimbanghon nanilehon ni angka namora i. Alai, molo Tuhan I di ida do na so ni ida ni jolma i. Di dok Jesus: " Situtu do hatangkon tu hamu: Gumodang do na nidabuhon ni na mabalu, na pogos an tubagasan poti parasian i, asa saluhut angka na mandabuhon i." (ay 43). Boasa songon i? Alasanna: " Ai sian lobilobi nasida do didabuhon be; alai ia parompuan an, sian pogosna do didabuhon saluhutna na di ibana, tung sandok hangoluanna i." (ay 44). Boruboru namabalu I mangalehon sude na di ibana. Ndang asa di ida halak pambahenanna I, alai dibahen ibana do na tuk tarbahensa, mangalehon sian nasa na adong di ibana. I do na niida ni Jesus, jala tung mansai arga situtu do I di Tuhan i.
Tu huria na di Korintus, di dok ap. Paulus, “Sebab jika kamu rela untuk memberi, maka pemberianmu akan diterima, kalau pemberianmu itu berdasarkan apa yang ada padamu, bukan berdasarkan apa yang tidak ada padamu. ( Ai molo adong ringkot ni roha, halashononhon do na dapot, nda tung salpu sian na dapot.) (2 Kor. 8:12). Di na mangalehon pelean, ingkon sian tulus ni roha do mangalehon, ai ndang mamereng balga ni pelean I Tuhan I, alai las ni roha namangalehon I do na nihalomohon ni Debata. Unang ma pasahat pelean, manang berkorban ala ni natarpaksa manang adong motivasi na buni (asa diboto jala diparsangapi dongan). Di dok ap. Paulus, Jala tung sura hubasabasahon saluhut artangku jala hupasahat dagingku, asa ditutung, tung na so marguna i di ahu, anggo so parholong ni roha ahu. (1 Kor. 13:3).
Sian nasa gogo ma talehon, jala na dumenggan ma pasahaton. Unang mabiar sotung gabe marhahurangan ala masilehon lehon, ai adong do Debata na tuk mangalehon, jala na rade mangalehon lumobi sian natahirim (2 Kor. 9:8). Na ringkot ima boha do sikap ni rohanta, songon dia do pangonjar ni rohanta di namarsilehonlehon (mangalehon pelean) ido namanontuhon pamuntenon  ni Tuhan di silehonlehonta (nang pelean, perpuluhan, mangurupi angka na susa). Dipaingothon Ap. Paulus Ganup ma nionjar ni rohana, unang ma sian muruk manang sian na so tarjua; ai dihaholongi Debata do na las roha mangalehon!" (2 Kor. 9:7).
 
 
Atik pe gumodang na nilehon ni angka namora I pelean di joro I, di dok Tuhan Jesus: gumodang do si 2 rimis na nilehon ni namabalu i. Asa, marasing do ukuran ni Tuhan I sian jolma manimbangi silehonlehon/ pelean.
Adong piga piga naringkot sirohahononta di napasahathon pelean/ marsilehonlehon:
1. Motivasi
Nadenggan do ulaon masilehonlehon, alai ndang sae holan mangalehon boti. Adong do halak masilehonlehon so adong motivasi na. Somalna molo sisongon I do, gabe boban do panghilalaan namasilehonlehon, gabe manghorhon ungutungut. Adong do motivasi namasilehonlehon asa diboto halak siadonganna, asa diparsangapi (pat. Mrk 12:41). Adong do motivasi masilehonlehon laho manghuphupi hahuranganna – asa unang diboto halak keadaanna nasasintongna.
Songon dia pe godang ni silehonlehon (pelean), molo mardongan ungutungut jala motivasi naso tingkos – tung so arga do I di Debata, jala dos do I tu naso mangalehon, jala dumenggan so pola mangalehon. Naeng ma motivasi masilehonlehon (pasahat pelean) ala holong niroha di Debata.

2. Ndang silehonlehon (pelean) I nagabe ukuran, alai nadihangoluhon. 
Na boi do holan sarimis sambing dilehon namabalu na pogos I asa adong sarimis nai pangkeonna. Marningot hapogosonna tung tarjalo roha do molo tung pe holan sarimis sambing dilehon. Alai dirajumi ibana; ndang etongetong ni hajolmaon sipangkeon molo naeng pasahat pelean tu Tuhan I, alai manghangoluhon/ manghaporseai hata ni Debata; sai naparmudumuduon ni Debata do ngoluna atik pe hurangan di materi.

3. Ndang dietong sian godangna alai sian porsina.
Ndang dituntut Debata asa dos godang ni pelean ni saluhut. “Kepada siapa banyak diberi, maka daripadanya akan lebih banyak dituntut”. Godang do nian nanilehon ni angka namora na dibaritahon di turpuk on, alai sian lobilobi na di nasida do na nilehon nasida i. Hape, otik pe na nilehon ni namabalu I – holan 2 rimis, sian pogosna do didabuhon – holan I nama na adong di ibana. jala tung sandok hangoluanna i. Na somal do molo mangalehon sian lobilobi, alai sada hasurungan do molo sian hapogoson boi masilehonlehon – ai ingkon namarhaporseaon na togu do tarbahen patupahon i.
Ndang apala dibaritahon be aha namasa tu namabalu I, naung mangalehon saluhut na adong di ibana gabe peleanna. Boi do adong mamingkiri; tung gabe anturaparon nama ibana ala so adong be pangkeonna laho manggohi ngolu siapari. Alai godang do dibaritahon di Bibel I, songon dia angka halongangan dipatupa Debata laho marmudumuduhon na hinaholongan ni rohaNa i. Jala tahaporseai do, sai na ramotan ni Debata do ibana.
Marhite turpuk on naeng lam tangkas dihita impola jala ojahan ni napasahat pelean tu Debata jala ulaon masilehonlehon. Dipengaruhi haporseaon do na taulahon, jala cara mangulahon ulaon I pe, sai na dipengaruhi na tahaporseai I do nang i.
Tahaporsea I do na di dok di Johanes 3:16, tung holong situtu do roha ni Debata tu hita, pola dilehon anak-Na na sasada i. Aha do balos ni holong ni Debata I bahenonta ? Adong do sada na boi bahenonta, ima: mangalehon tu Debata.

Panimpuli:
Atik pe na pogos boruboru namabalu I jala leas roha ni jolma marnidasa, alai ibana ma nagabe gombar ni napasahat pelean nahinalomohon ni Debata, namangalehon sian tulus ni roha. Molo naeng mangalehon hita tu Debata, sian tulus ni roha ma, unang asa diboto halak, asa dapotan sangap manang pujian. Diguruhon boruboru namabalu, napogos I do asa disiplin mangalehon tu Debata. Di napasahat pelean I ibana, dipasahat sude na di ibana, dihaporseai do: “marhuaso do Debata marmudumuduhon ngoluna”. Di namangalehon tu Debata, namarsiajar do hita unduk tu patik ni Debata na mandok: "Lehon hamu ma, gabe lehononna ma di hamu!"(Luk. 6:38), jala huhut namarguru pasahathon ngolunta tu pangaramotion Debata, sitompa hita.
Dilehon namabalui I do saluhut na adong di ibana, saluhutna na di ibana, tung sandok hangoluanna i. Boasa boi tarbahen songon I ? Ala tung mansai holong situtu rohana di Debata, gabe diharingkothon jala dipatujolo Debata.
Pelean na tapasahat I patuduhon harohaonta di Debata. Pelean natapasahat jumotjotan dope ala ni kewajiban sambing. Tarida do sikapta tu Debata sian pamelehononta; tingki, gogo, nang sihumisik. 
Manang dia pe na boi tarpelehon nuaeng, dipelehon ma dibagasan las ni roha nionjar ni holong tu Debata, sian tulus ni roha. Dua rimis manang sarimis pe na tarlehon, tung arga do I di Debata molo I na dumenggan na adong dihita. Pasangap ma Jahowa marhite sian hamoraonmu dohot marhite sian patumonaan ni sandok pangomoanmu. Jadi marsipinjot ma angka sopom, jala sirnip tuak anggur angka pangilanganmu. (Poda 3:9-10).Amen.

Johannes 13:14-15

Patujolo:
Persaingan nunga gabe bagian naso tarpisiding sian ngolu on. Pola do ganup ari di bagian ni parngoluonon sai dituntut asa bersaing; ise naung dihaholongi di jabu, bersaing di parsingkolaan, suang songon I di parkarejoan. Adong do na bersaing di perjodohan. Bersaing di batas-batas naung tontu I – denggan do I, gabe boi termotivasi mambahen na dumenggan asa boi manghamonanghon persaingan i. Alai boi do persaingan manghorhon na hurang denggan. Persaingan na so boi dikendalihon boi do mambahen jolma I lupa diri, menyikut bahkan manegai halak (saingan i) mamangke ragam ni cara, asa boi monang. Di televise nunga jotjot tarida persaingan marhite angka iklan namandabuhon (paroahon) saingan i. Mungkin mengkel do hita mamereng iklan I (isara iklan ni angka operator jaringan kartu HP), alai sadar do hita; angka I nunga mempengaruhi pola pingkiranta ? Lam leleng gabe sada naung somal ma sisongon I gabe mempengaruhi jolmai laho mangulahonsa – gabe mago ma holong niroha sian ngolunta.

Hatorangan:
Nunga leleng masa persaingan I, nang ditingki masa ni Jesus nunga masa persaingan; ise nasumurung (dumenggan) di angka sisean I, pola gabe marsual sama-sama nasida (Luk 9:46). Tung andul sian tiruan na binahen ni Jesus, gumogo dope pola piker ni portibion mangarajai roha nang pingkiran ni nasida. Tapamanat ma anak ni si Sebedeus (Johannes dohot si Jakobus) pola ro natorasna (inana)mangelek elek Jesus asa boi anakna na nadua I hundul di siamun dohot hambirang ni Jesus di harajaonna I (Mat. 20:21). Alai alus ni Jesus “Ndang diboto hamu napinangidomuna”.
Hasangapon do napinarsinta dohot mangarajai rohanasida. Ndang dapot rohanasida dope, namarhasurungan (naumbalga) di harajaon banua ginjang I ndada na hebat, naumbalga mangihuthon portibion- baliksa naummetmet mangihuthon penilaian ni portibi (Lukas 9:48), “ Manang ise hamu na naeng sangap, I ma gabe pangoloi di donganna. Jadi manang ise hamu, na naeng parjolo, I ma gabe naposo ni donganna”  (Barangsiapa ingin menjadi besar di antara kamu, hendaklah ia menjadi pelayanmu, dan barangsiapa ingin menjadi terkemuka di antara kamu, hendaklah ia menjadi hambamu.)" (Matius 20:25-27). Holan na mandok do Jesus disi ? Ndang. Dibahen Jesus do diri-Na saleleng ngoluna di portibion gabe tiruan nanaeng siihuthononta: “Songon Anak ni jolma I pe, ndada asa dioloi halak Ibana, umbahen na ro; Ibana balik pangoloi jala mangalehon hosanna bahen tobus ni torop jolma” (Mat.20:28).
Dibahen Jesus do tiruan tu angka sisean I mangalapati ise do na umbalga (nasangap); ndang ala ni popularitas, hamoraon, alai marhite sambong dohot ulos. Dipatutoru Jesus do diri-Na mamuri pat ni angka sisean, ulaon ni sahalak hatoban (naposo/ pelayan). Napinatupa ni Jesus patuduhon sada tiruan, asa olo hita paturehon pola pikir ta jala mangantusi songon dia do na pinangido ni Debata siulahononta: “Asa molo Ahu, Tuhan jala Gurumuna, mamuri patmuna, tama ma nang hamu masiburian pat! Ai sitiruon do hulehon tu hamu songon naung hubahen I tu hamu” (14-15).

Sipahusorhusoron:
Diparngoluonta nag ok persaingan on jotjot mambahen hita lupa songon dia do nian hita di adopan ni Debata. Denggan do persaingan molo hinorhon ni gabe lam termotivasi hita mambahen nadumenggan. Alai molo gabe taronjar rohanta asa gabe sumurung jala umbalga/ unsangap marhite namangharingkothon / namangalului jala papurguk hamoraon (arta), sangap, popularitas, status, kejayaan di portibion naung mulai tatinggalhon Debata. Tiruan na binahen ni Jesus naeng siihuthononta; martoruk ni roha, ringgas mangurupi, mangharingkothon na dingan, kejujuran, mangulahon na denggan, jala
asa rade sahalak na gabe uluan (namarsangap) manghobasi di angka na tumoru sian ibana, na nionjar ni holong ni roha.
Ulaon mamuri pat di paradaton (hasomalan) ni halak Jahudi somal diulahon tingki ulaon parmanganon (perjamuan makan). Nasa na digokhon tusi, laho masuk tu jabu sai jumolo do diburi angka naposo ni parjabu I pat ni angka tamue. Alai adong do nang hasomalan; di angka pamolus (musafir) na mampir laho bertamu, pamurion I ndada holan laho paiashon pat – huhut do mandampol asa gumanggang halojaon nasida naung dao mardolan. Jala boi gabe huhut mangubati luka hinorhon ni na mandegei batu uju dipardalanan i. Tona nanaeng dohonon ni Jesus sian tiruan nabinahenNa i, Ulaon pamurion I gabe sada tudosan diulaon ni Jesus mangalehon gogo naimbaru (kesegaran) diangka na hinaholongan I – angka naporsea di Ibana. 

Jesaya 52:13 – 53:12

Patujolo:
Buku Jesaya dibagi gabe 3 (tolu) bahagian, ima: Proto- Jesaya (Ps. 1- 39), Deutero-Yesaya (Ps. 40 – 55) dan Trito-Yesaya (Ps. 56 – 66). Jesaya 52:13 - 53 :1-12 bagian sian Deutero-Jesaya, jala merupakan sada sian 4 bindu (42:1-9;49:1-13;50:4-9;52:13-53:12) nadigoari angka pande bisuk ni Bibel ‘Angka Ende ni Naposo ni Tuhan (Nyanyian-Nyanyian Hamba Tuhan), namanggombarhon panjouon (parsuruon) napinasahat ni Debata tu angka naposo-Na (42:1-9; 49: 1-13) jala panghorhon ni panghobasion (pangulaon) ni naposo I manghorhon sitaonon di ibana alai parohon haluaon tu natorop. Alani I ma tar dok ibana sintong jala patimboon (50:4-9; 52:13-53:12).
Masa dihabuangan do ujui halak Israel di Babel, adong do marhira 4.600 jiwa (Yer. 52:28-30) nasida. Atik pe di habuangan nasida alai dilehon do di nasida keleluasaan aktivitas siganup ari: pajonjong jabu, martini, martigatiga, manguduti ulaon parugamoon sandiri dohot mangulahon paradatonna alai tongtong do nasida tarihot tu aturan ni panggomgomi Babel. Boi do nasida membangun komunikasi tu keluargana di Jehuda (naung gabe bagian sian provinsi Babel). Asa sai taringot dope nasida jala masihol tu habalgaon ni Israel – jala naeng mulak tusi. 40 tahun lelengna nasida di Babel manghorhon do I tu haporseaon nasida maradophon Debata. Sungkun-sungkun do rohanasida dihasasaut ni bagabaga, panghirimon dohot hagogoon ni Debata (bnd. Yes. 40:27; 49:14, 24). Nunga torop sian nasida gabe munggil haporseaonna tu debata sileban (Jes. 46:1-9), jala adong do na tongtong hot marhaporseaon di Debata alai nunga mameakhon panghirimonna tu huaso ni debata sileban (Yes. 57:3-13).

Hatorangan:
Ayat on dibuhai dohot pandohan : “ida ma” laho manait roha ni angka bangso dohot nasa raja tu hata ni Debata manaringoti “hapistaran” (keberhasilan) ni naposo-Na nanaeng sipapataron. Hapistaran  (keberhasilan) ni naposo ni Tuhan namanaon haporsuhon mangula ulaonna I gabe tarhinsat jala dipatimbo (TB-BIS : disanjung, TB-BIS: ditinggikan) gabe timbul situtu; Dungi digombarhon hinorhon ni sitaononna I mambahen halak  tarsonggot mida hinaroa ni rupana dibahen tandina sian jolma. Alai alani ulaonna I gabe hohom (LAI: tertegun) be do angka raja maradophon ibana, ai halak na so dung panahatan ni barita i, nasida do marnida, jala halak na so dung umbegesa, i do mangantusi sogot.
Di Bindu 53 ayat 2-3 digombarhon do hansit ni partinaonan ni naposo I songon tunas sian tano na mahiang, dileai jala dipasiding jolma do ibana, baoa na somal mangae pardangolan dohot sahit ibana, pola ditabunihon halak bohina maradophon ibana, dibahen leana, jadi ndang pola hurajumi hami ibana.
Disuru do naposoNa I tu ganup bangso, alai ala hinaroa ni rupana ndang dijanghon Ibana songon jolma, mabiar jolma jonok tu ibana. Songon I ma namasa tu Jesus na hona sipal dibahen angka soldadu ni halak Rom. Ditingki marsitaonon ibana, ndang nanggo sada na olo manjonohi.
Di ayat 4-7, digombarhon do ala ni aha ibana manaon i: mangusung angka sahitta, mamorsan angka pardangolanta diporsan, ala ni pangalaosinta ibana tartullang, binahen ni hajahatonta ibana mabugang. Ampe tu ibana pinsangpinsang parhitean ni hasonanganta, jala binahen ni bugangna malum itahilala. Alai anggo rohanta mandok: Debata do maminsang, mamungkul dohot pasipal ibana.
Dipasombu ibana do dirina diparsipal, nanggo pamanganna ndang mangkuling. Songon birubiru do ibana na tinogu tu pamotongan, jala songon anak ni birubiru na hohom maradophon jolma sigusting ibana, tung na so dibungka do pamanganna. Atik pe songon I ndang adong halak manarihon ibana. Mate ibana, di dok roha ni jolma I ala ni hajahaton/ dosana do I; nang pe so marsala ibana.

Sipahusorhusoron:
1.      Dihabuangan Babel I marlea do halak Israel, gabe mago harkat dohot martabatna sebagai manisia. Tung dokdok do diae nasida di pandangan dohot penilaian ni halak di sitaonon nasida I alai marhite campur tangan ni Debata, paulion do muse nasida (pat.Jes. 54; 55;56). Lapatanna, haberniton nasida I gabe dos bobotna tu keberhasilan nanaeng jaloon nasida natung manghalashon roha jala mambahen longang portibion (kagum). Molo dipartudos pe bangso Israel gabe “naposo” ni Debata; keberhasilan (hapistaran) ni naposo I ndada alani hagogoonna sandiri, alai ala Debata Debata do margogoihonsa. Marlapatan, sasintongna ndang na tarbahen naposo mamolus sitaonon I alai Debata mambasabasahon hapistaran (keberhasilan) I di nasida.
2.      Halak na pistar somalna berhasil do diulaonna. Keberhasilan dalam arti mempertahankan keberadaan dalam situasi yang amat sulit. Jadi; dipatimbo, gabe timbul situtu ndang dalam kerangka kesuksesan yang luar biasa, alai hinorhon ni ketekunan mandalani jala mamolus sitaonon I mardonganhon naasing gabe muba sian haholomon tu hatiuron, sian haporsuhon tu hasonangan.  Asa, molo tung pe ingkon bolusanta angka sitaonon ala ni Kristus I, ingkon pistar do hita – marhite manjalo hagogoon sian Debata asa boi sahat hita tarhinsat jal tu hatimbulon sogot.

3.      Nunga dilumbahon Jahowa hian haroro ni sahalak “naposo ni Debata”. Naposo I gabe  sahalak namarlea jala dipasiding jolma; ai gok sitaonon dohot haberniton aeon-Na. Nunga ditodo Debata hian Ibana laho manuhuk ulaon ni sahalak naposo na ingkon manea dosa dohot hasalaan ni bangso-Na. Ala hororo-Na I naeng patulushon ulaon ni Debata manuhuk sude dosa ni bangso-Na I, alani I ingkon hohom do Ibana manaon saluhut haleaon nang haporsuhon. Di dok panurirang Jesaya: Dipasipal pe ibana, sai manaonnaon do anggo ibana, ndang manang mangkuling pamanganna, songon birubiru do ibana na tinogu tu pamotongan, jala songon anak ni birubiru na hohom maradophon jolma sigusting ibana, tung na so dibungka do pamanganna. Dison, naposo ni Tuhan I ingkon gabe korban na tinogu tu pamotongan. Jesus do na nilumbahon ni panurirang Jesaya I, songon na ni dok ni si Johannes : “On do Birubiru ni Debata, na mamorsan dosa ni portibi on!” (Yoh. 1:29). Nunga gok na ni dok ni si Johannes I, songon naung taboto pambahen ni Jesus manuju inganan penyiksaan sahat tu mangalangkahon langkana tu hau pinarsilang I tu dolok partangkurahan di Golgata, hohom do ibana so mangalo. Jesus, birubiru ni Debata, pasahathon diri-Na gabe pelean hasesaan ni dosa; manggohi bagabaga ni Debata laho paluahon jolma pardosa. Boha, nunga taruli hita ulaon na pinatupa ni Jesus ? Amin

Johannes 20 : 1 – 10

1. Holong ni roha di Tuhan Jesus patubu pangantusion dohot haporseaon di ulaon ni Tuhan Jesus.
Di pinggir Kota Jerusalem, adong do sada lokasi tanoman na pineop ni si Josep na sian Arimatea, sahalak bangsawan Jahudi do ibana. Dung hira botari, di ari Jumahat i, dipamasuk si Josep na sian Arimatea i ma bangke ni Jesus tu sada liang batu naung adong hian di lokasi kuburan i. Dungi, ditutup ma pintu ni liang i dohot batu. Dung ditutup, disahap ma dohot sahap ni si Latus (Mat 27:66), asa unang adong namambuka. Angkup ni i, ala dirajumi Pamarenta Rom do sialo Kesar Rom Tuhan Jesus, jala torop angka pengikut Na, dijaga angka soridadu do kuburan ni Jesus i.

Di ari patoluhon, dung ditanom Jesus di kuburan i, pas di ari parjolo dung salpu Sabat i, ima sogot di ari Minggu (istilah Gorik na dipangke ima “proi”, mandok sekitar pukul 3.00-6.00 manogot), lao ma Si Maria Magadalena manopot kuburan i. Ia si Maria Magdalena, na ro do i sian kota Magdala di pesisir pantai Tao Galilea. Ibana ma sahalak na hea dipamalum Jesus sian panggosagosa ni pitu tondi na hodar dohot sian parsahiton naung mansai leleng diae (Luka 8:2). Ibana ma sahalak pengikut ni Jesus na mansai burju jala na satia.

Tujuan ni si Maria Magdalena manopot kuburan ni Jesus, ima laho mamiahi bangke ni Jesus dohot angka miak na hushus (Luk 24:1). Hasomalan do di Palestina manopot kuburan ni naung tolu ari dikubur. Mangihuthon haporseaon nasida, di bagasan na tolu ari i, tongtong dope mangareapreap tondi ni na mate i di atas kuburan i. Alai dung salpu tolu ari, ditadinghon tondi ni na mate i ma kuburan i, alana bangke ni na monding i pe nunga mulai busuk, ndang boi be tandaon.

Dung sahat si Maria Magdalena tu kuburan i, diida ma naung dihindat batu tutup ni tanoman i (ayat 1). Ro ma tu roha na mandok, naung ditangko halak bangke ni Tuhan i. Ia so i, naung dibuat soridadu i bangke ni Tuhan i asa dileai, alana ndang sombu dope roha nasida molo holan mamparsilangkon Tuhan i sahat tu na mate. Dipingkiri roha ni si Maria Magdalena, ndang taratasan na be na masa i. Gabe marlojong ma ibana manopot si Petrus dohot tu si Johanes, paboahon tu nasida:” Nunga dibuat namambuat Tuhan i sian TanomanNa: ndang binoto manang tu dia ditaruhon” (ayat 2c).

Dung dipaboa si Maria Magdalena tu si Petrus dohot si Johanes, na so di tanoman i be Tuhan Jesus, pintor marlojong do nasida na dua manopot tanoman ni Jesus (ayat 4). Parjolo do sahat si Johanes. Mungkin, ala umposo ibana sian si Petrus. Gumogo ibana marlojong. Parjolo do masuk si Petrus tu tanoman i. Alai anggo si Johanes, holan dipaunduk do jolo dirina mandulo tanoman i. Parpudi do si Johanes masuk tu udean i. Satongkin, longang do roha ni si Petrus mamereng tanoman na rumar i, alai anggo si Johanes nunga mulai marpinggkir. Pingkiran ni si Johanes:”Molo adong na mambuat bangke ni Tuhan i, boasa ndang dibuat angka sekka panaputi ni uluna dohot angka pangalilit i. Tongtong do dibalun di inganan na. Sekka panaputi ni uluna, tongtong do di inganan ni uluna hian. Marhite i, dipingkiri rohana ma, ndang na dibuat namambuat Tuhan i, alai na hehe do, gabe tinggal ma angka sekka panaputi ni uluna dohot pangalilit na i.

Mansai patar do taida di jamita on gogo dohot huaso ni holong ni roha. Hinorhon ni holong ni roha ni si Maria Magdalena di Tuhan Jesus, sisi do sian ibana nasa habiaran laho papatar holong na tu Tuhan Jesus. Laho do ibana manopot kuburan ni Jesus nangpe holom dope sahat ibana tu kuburan i. Hinorhon ni holong ni roha ni si Maria Magdalena di Tuhan Jesus, ibana do parjolo sahat tu udean i. Hinorhon ni holong ni si Maria Magdalena di Tuhan Jesus, boi do ibana mangoloi Tuhan Jesus sian nasa roha dohot gogo na, nangpe so apala tangkas diantusi ibana sude na hinatahon ni Tuhan Jesus (ayat 9) dohot angka na masa na ni ida na di tanoman i. Hinorhon ni holong ni roha ni si Johanes di Tuhan Jesus (ayat 2), ibana do na parjolo porsea di hahehehon ni Tuhan Jesus sian na mate (ayat 8). Holong ni roha ni si Johanes di Tuhan Jesus mangalehon tu ibana “mata” laho manjaha angka tanda-tanda i, dohot pikiran laho mangantusi na ni idana i. Holong boi do manangkup hasintongan, molo pikiran ndang boi mangalehon kepastian. Holong boi mangantusi lapatan ni angka na masa, molo pingkiran ndang boi mangantusi.

2. Tutu situtu do hehe Tuhanta i, hita pe ingkon hehe do.

Nunga rumar tanoman i diida si Maria Magdalena dohot diida dua halak sisesean ni Tuhan Jesus, ima si Petrus dohot si Johanes. Haheheon ni Tuhan Jesus sian na mate, ima sada bukti na hot rodi saleleng ni leleng na, paboa “pilot project” na so ada tudosan, ima haluaon tu saluhut jolma manisia, nunga sidung diula Jesus dohot singkop. Marhite hamamatena di hau pinorsilang, dipelehon do hosana bahen hasesaan ni dosanta. Marhite haheheon na sian na mate, ditaluhon do musu na jumorbut di hita, ima hamatean i. Disurathon Apostel Paulus do hinauli ni panobuson ni Tuhanta Jesus on di hita, di nanidok na:”Ai molo porsea hita, naung mate Jesus dohot hehe, sandok togihonon ni Debata do rap dohot Jesus nang angka naung monding marhitehite Ibana” (1 Tess 4:14).

Ganup hita na hea mangolu di portibion, ingkon haporseaanta do hasintongan on. Molo tanoman i do ujung ni saluhut na, ndang marasing hita sian bungabunga na di ladang i. Mangerbang satongkin, dungi malos. I do ujung na. Ndang adong sihirimon be udut na. Hata ni Tuhanta na namamaritahon haheheon ni Tuhan Jesus sian na mate sadarion, tutu situtu do Barita Nauli (Berita Kesukaan-Good News) di hita saluhut na. Tung sintong do nabinaritahon ni Hata ni Tuhanta sadarion tu hita. Peristiswa Paskah (haheheon ni Tuhanta Jesus sian na mate) tutu situtu do masa (authentic), sungguh-sungguh terjadi (genuine).

Hasisintong ni Barita Nauli namamaritahon haheheon ni Tuhanta Jesus on, ndada holan dihatindanghon si Maria Magdalena, si Petrus dohot si Johanes di jamita on, alai nunga dibuktihon secara ilmu sejarah (history), ilmu purba kala (archaeology). Disiplin-disiplin ilmu on nunga membuktikan paboa tanoman nampuna ni si Josep na sian Arimatea i, rumar do di ari Paska, manang di ari Minggu manogot i. Ndang adong namamaritahon (dohot alasan mendukung manang mangalo barita i) na so rumar tanoman i di Minggu Paska i. Alai, mansai porlu do parrohahononta. Paboa ndada holan hasisintong ni tanoman na rumar i na ringkot di hita. Ai molo holan i do, ndang marlapatan i tu haporseaonta. Tu dos do i tu lapung ni eme na rumar. Manang tu ampelop ni surat na rumar, na so adong surat na. Ndang marimpola i. Molo holan barita ni tanoman na rumar do, ndang margogo i patubuhon Huria. Alai, barita ni tanoman na rumar i, diuduti do dohot barita ni Tuhan Jesus Kristus napatuduhon diriNa manang pigapiga hali. Tarhira 25 taon dung peristiwa hahehehon ni Tuhanta i sian na mate, dihatindangkon Apostel Paulus do, mandok: “Jadi dipataridahon do dirina tu si Kepas, dungi tu na sampuludua i. Dungi dipataridahon dirina sahali tu lobi lima ratus dongan; na tumorop sian angka i mangolu dope, deba do naung monding. Dungi dipataridahon dirina tu si Jakobus, dungi tu angka apostel i sudena. Alai di pudi ni saluhutna i, dipataridahon do dirina nang tu ahu, na tardok tubu di na so tingkina”.(1 Kor 15:5-8).

Boruboru, Maria Magdalena, parjolo sahali marnida tanoman na rumar i, manghatindangkon Jesus na hehe i, di Minggu Paska parjolo i. I do manguba ngolu nasida, dohot manguba tujuan (arah) sejarah ni ngolu nasida dohot ngolunta. Ala naung singkop ulaon na paluahon hita diula Tuhanta Jesus Kristus, gabe ngolu na marpangkirimon di hangoluan sogot nama ngolunta. Hamatean, ndang be ujung ni saluhut, ndang be musuh parpudi, alai “harbangan” mamongoti hangoluan saleleng ni leleng na rap dohot Sipalua, ima Tuhan Jesus Kristus naung hehe i. Hehe do Tuhanta i. Tutu situtu do Ibana hehe.

Haheheon ni Tuhanta i sian na mate, ndang tarsirang i sian haheheonta angka na porsea di Ibana. Haheheon ni Tuhanta i sian na mate, ihuthononta do muse hehe sian na mate. Tuhanta Jesus Kristus do “patumonaan” (“buah sulung”) ni angka na porsea hehe sian na mate. Mauliate ma di Tuhanta na mangalehon hamonangan on di hita marhitehite Tuhanta Jesus Kristus. Amen.

Lukas 24 : 36 – 45

Patujolo:
Adong do manang pigapiga hali dibaritahon napajumpang halak dohot Jesus dung hamamate-Na I, gabe dihatindanghon nasida naung hehe Jesus sian hamatean. Hape tung hatahutan situtu do angka sisean I dung diparsilangkon Jesus di dolok Golgata pola martabuni nasida. Alai dung haheheon ni Jesus I lam tamba do hagarangon nasida laho mamaritahon Jesus Kristus. Namasa on pahothon natutu do naung hehe Jesus sian hamatean. Haheheon ni Kristus I pabangkithon haporseaon nasida gabe so mabiar be nasida mate laho mamaritahon barita nauli i.
Godang do naso porsea naung hehe Jesus sian hamatean. Asa tung tarsonggot situtu do nang angka sisean I di na tompu jongjong Jesus ditongatonga nasida. Ndang holan tarsonggot tahe, huhut do mabiar jala ndang porsea. Diboto Jesus do na diroha ni angka sisean I, ndang disalahon nasida; alai lambok do pandohanna laho pahothon jala patoranghon roha nasida marhite na paingothon angka pandohan-Na uju rap dope nasida taringot tu Ibana.
Di dok ap. Paulus, “Ai anggo so hehe Kristus sian angka na mate, rumar ma jamitanami, laos rumar ma nang haporseaonmuna.” (1 Korintus 15:14). Marisuang do haporseaonta molo so tutu naung hehe Jesus sian Hamatean :” Tardapot ma nang hami ala pargapgap di Debata, ala maralohon Debata huhatindangkon hami, naung dipahehe Kristus i, hape ndang dipahehe, anggo sandok so mulak mangolu angka na mate. (1 Kor. 15:15) jala magopo ma haporseaonta, jala tong dope hita di bagasan dosa (ay.17). Nasasintongna : “ nunga hehe Kristus i sian na mate, Ibana do parjolo ni angka na monding i.”

Marpardomuan tu angka saksi mata on, tung mansai godang dope bukti paboa na hehe do Tuhanta i sian na mate. Boi do idaonta i sian hamubaon ni angka sisean i, sian sisean na so porsea, manang sian sisean na ganggu, gabe sisean naporsea. Ndada holan porsea tahe, alai sahat do tu na olo maneahon hosana alani haporseaonna i. Tutu situtu do hehe Tuhanta i sian na mate. Marhite i do, nang angka Malim alo ni Jesus hian gabe porsea tu Tuhan Jesus (Ul. Ap. 6:7).

Sipata olo do tubu dibagasan roha, tumagon nian jongjong Jesus di jolonta patoranghon Hata ni Debata songon nabinahen-Na I tu angka sisean tingki i. Alai ndang songoni nanaeng bahenon ni Jesus, nuang pe naeng manghatai do Jesus dohot hita, naeng mambuka pingkiranta, mangungkap sipareon ni haporseaonta asa tabege Ibana marhite angka Jamita.

Hatorangan
Tung maol manggombarhon depresi na dialami angka sisean hinorhon ni nadiparsilangkon Jesus. Ndang dapot roha nasida naingkon porsanon ni Jesus sitaonon dohot haleaon sahat ro naingkon tarsilang jala mate, alai ingkon mulak mangolu muse sian hamatean i. Asa, dung masa songon I tu Jesus gabe dibagasan hatahutan bolon do nasida jala martabuni. Dirajumi nasida, tung soboluson ni Mesias (Jesus) do ianggo hamatean (Joh.12:34). Tung biar situtu rohanasida maradophon halak Jahudi nang Sintua Nimalim pola ingkon disordak nasida angka pintu (Joh. 20:19), tarlumobi dung sar barita naung mago bangke ni Jesus jala dituduh nasida namabuat bangke I (Mat.28:11-15).
Dinamanaringoti namasa I dope nasida dibilut na tung mansai buni jala sordak, tompu do jongjong Jesus ditongatonga nasida (ay.36). Molo tapamanat pandohan “sordak” (terkunci rapat) alai boi Jesus gabe jongjong ditongatonga nasida marlapatan ndang adong inganan na buni jala sordak naboi mangambati haroro ni Jesus. Hata ni Jesus na mandok “Dame ma di hamu!” patangkashon haroro ni Jesus mambahen jala mamboan dame tu nasa na jinumpanganNa.
Tung tarhalomong jala tahutan situtu do angka sisean I, dirimpu do tondi (begu) na niida nasida. Situasi I patangkashon naso pola dihirim (ndang porsea?) nasida di haheheon ni Jesus sian angka namate. Hatiha rap nasida (uju ngolu ni Jesus) nunga hea dipabotohon tu nasida nanaeng masa tu Ibana sitaonon – hamatean – jala mulak mangolu (pat. Luk 18:33, Mat. 20:18, Mrk. 20:33), alai atik so diparrohahon manang so dihaporseai nasida hata i.
Maklum do Jesus di situasi nasida I (natahutan),  alani I dipamenak do roha nasida – dipatuduhon tu nasida bukti-bukti fisik : “Boasa tarhalomong rohamu jala boasa songon na ganggu rohamuna? Bereng hamu ma tanganku dohot pathu, paboa Ahu sandiri do! Jama hamu ma Ahu jala tilik hamu ma; ai anggo tondi ndang marsibuk manang marholiholi, songon na niidamuna di Ahu. Uju mandok songon i, dipatuduhon ma tanganna dohot patna tu nasida. Jala asa tung porsea situtu nasida disuru do nasida manjama, jala di dok muse: “Adong dipeop hamu dison manang dia sipanganon?” (41). Ndang namale Jesus umbahen na dipangido sipanganon, alai lao pa poshon roha nasida – ndang tondi (begu) Ibana, natutu do daging (tubuh) Ibana. Naeng dipadasip tu roha nasida ndang holan tondi ni Jesus na hehe sian hamatean, alai dohot do nang daging-Na.
Dung pos roha ni angka sisean I – malua nasida sian hatahutan, “dibungka” ma pingkiran nasida “asa diantusi na tarsurat i.”

Sipahusorhusoron
Songgot-songgot nauli tung manghalashon roha do jala boi mangalehon gogo naimbaru mula ulaon. Alai songot-songgot na roa (mengecewakan) gabe pagalehon roha do I mula ulaon jala boi manghorhon pandeleon. Nunga jotjot sisean marsaulihon songgot-songgot las niroha na dipatupa Jesus angka tanda halongangan, pamalumhon angka namarsahit. Alai ditingkina ingkon rade do sisean manjalo songgotsonggot na pahabothon roha. Nadipasahat I Jesus tu paruhuman tung sada na pahabothon jala pagalehon roha. Lam muse ingkon parsilanghonon Jesus jala mate, tung sada namasa na pagalehon roha. Situasi na songon I olo do adopan ni angka naporsea I, mangadopi sitaonon na posa na boi pagalehon roha jala gabe manghuphupi pingkiran nang mata ni haporseaon.
Dung dibungka Jesus pingkiran ni angka sisean I marhite haheheon-Na I gabe lam margogo do nasida jala ndang be mabiar mangadopi angka namasa hinorhon ni na manghatindangkon Jesus – nang ingkon mamolus hamatean pe. Nunga diuba Jesus nasida sian parbiar hian gabe halak na barani mate (martyr) ala naung dihaporseai nasida naung hehe Jesus sian hamatean. Alani I ma, ndang be pangambati di nasida haporsuhon dohot ancaman hamatean laho manghatindanghon haheheon ni Jesus.
Disangkapi Jesus asa saluhut halak Kristen marsaulihon las ni roha-Na I, asa boi hita tongtong dibagasan las niroha marpanghirimon molo tung pe mangadopi gok hamaolon di parngoluon on (Rom.15:13). Alani, molo tung sungkot rohanta mamingkiri angka hamaolon dingolunta, ganggu hita di angka sipatupaon, ganggu rohanta disipanganon parabiton, ganggu taringot di masa depan, mabiar mangadopi hamatean; tahaporseai ma Kristus naung hehe I sian hamatean na tuk gogo-Na mangurupi jala pamonanghon hita sian saluhut hamaolon i. Dame dohot las ni roha do dipatupa Jesus tu angka sisean na dibagasan hatahutan I, suang songon I do naeng bahenonna nang tu hita. Di dok Jesus tu angka naporsea i: “Pangido hamu ma, asa manjalo hamu, asa gok halalas ni rohamuna!” (Joh. 16:24). Talehon ma roha dohot pingkiranta di bungka Jesus marhitehite hata-Na. Amen.